Збогувајте се со масната зимска храна и внесете здрави навики во вашата исхрана
Пролетта е време на промени. Затоа, започнете со една позитивна промена на подобрување на вашето здравје, започнете од храната, како клуч за добро здравје. Кога велиме чистење, не мислиме на популарната детоксикација на организмот. Најпрво, треба да се разјасни дека детоксикација на организмот е медицинска постапка со која пациентите се чистат после долготрајната терапија со лекови, додека детоксификацијата за која што постојано се зборува, претставува тренд кој е делумно производ на неинформираност. Имено, здравото тело има бубрези, црн дроб, кожа, бели дробови, односно органи кои што се задолжени за преработка и прочистување и тоа го прават цело време.Наша задача е да ги одржуваме здрави преку консумирање здрава храна и придржување до правилен начин на живот, а не да го истоштуваме телото со прочистувачки методи. Популарноста на детокс методот се заснова на позитивните искуства на оние после детоксот, кои што тврдат се чувствуваат многу поздраво. Главната причина за тоа е дека тие денови не внесувале процесирана храна. Воедно, детоксот може да биде штетен од повеќе причини: изгубените килограми брзо се враќаат, се губи мускулна маса итн. Решението е јасно – не ви се потребни брзи детоксификации коишто можат да бидат штетни за вас, туку потребно е правилно да се храните и тоа не само во пролет или лето, туку постојано.
Подобрете го дигестивното здравје
Консумирајте пробиотик но преку храната, како јогурт или кефир, за да го подобрите дигестивното здравје. Лененото семе е исклучително богато со растворливи и нерастворливи растителни влакна кои значително придонесуваат за добро дигестивно здравје, а воедно поседува и голема количина на магнезиум, кој му е многу потребен на организмот за забрзување на метаболизмот. Обезбедувањето на доволно диетални влакна во исхраната, значи добра работа на цревата, така што, добар избор се и муслите без оглед дали ќе ги консумирате за појадок или вечерна ужина, нема да погрешите.
Јадете почесто и помали порции
Контрола на порциите е подеднакво важна колку и тоа што го јадете. Редовно појадувајте и не заборавајте да одвоите време за ужина. Здравиот појадок треба да биде комбинација од хранливи влакна, протеини, јаглехидрати и здрави масти. Вашиот избор може да бидат овесни снегулки, бидејќи овесот содржи антиоксиданси, го намалува гладот и може да ве држи сити до ручекот. Треба да имате најмалку две ужини дневно и наместо чоколадо, за здрава ужина додека сте на работа, одлучете се за сушено овошје, јаткасти плодови, микс од четири семиња, итн. Да се избере здрава ужина не бара особено голем напор, само свесен избор и малку планирање.
Јадете храна за енергија
Пролетниот замор е честа состојба со која што се соочуваат многумина овој период од годината. Една од причините за ваквиот замор е и недостаток на витамини, а најмногу недостаток на железо. Недоволното внесување на железо во исхраната може да предизвика анемија. Затоа, овој период е особено важно да внесувате намирници коишто содржат железо, како зеленчук, мешунки, јаткасти плодови, јајца, месо, житни производи. Дајте му предност на интегралниот ориз наместо белиот ориз, бидејќи има голема количина на диетални влакна и побрзо ја вари храната а е и многу похранлив. Семките од тиква содржат големи количества на железо, магнезиум, цинк и витамин К.
Внесете ги гоџи бобинките во вашата исхрана, бидејќи ги нарекуваат уште и „среќни бобинки“ зашто ја зголемуваат енергијата и издржливоста. Исто така, овој плод се смета за најголем извор на железо што може да го поседува една билка. Овде ќе го споменеме и чиа семето, бидејќи името „чиа“ потекнува од древниот јазик на Маите којшто означува „сила“. Значењето на името во целост го опишува дејството на чиа семето врз организмот, бидејќи се користи за зголемување на енергијата.
Секогаш внимавајте да пиете доволно вода, бидејќи водата го прави потребниот транспорт на хранливи состојки и кислород во клетките заради кои добиваме енергија. Воедно, не ви треба длабок џеб за да бидете здрави, туку правилен избор на храна, кој се состои од здрава и балансирана исхрана, помалку стрес и повеќе сон и одмор.