Половина од светското население сè уште не е во можност да ги добие здравствените услуги што му се потребни.
Светската здравствена организација беше заснована на принципот дека сите луѓе треба да можат да го остварат своето право на највисоко ниво на здравствена заштита. Затоа „Здравјето за сите“ е водечката визија на организацијата повеќе од седум децении. Таа е, исто така, поттик за поддршка на земјите од целиот свет за подобрување на состојбата на општата здравствена заштита.
„Оваа година се одбележува 70-годишнината од основањето на Светската здравствена организација ги повикува светските лидери да ги исполнат ветувањата што ги дадоа кога се согласија со целите за одржлив развој во 2015 година и да се посветат на конкретни чекори за унапредување на здравјето на сите луѓе. Ова значи дека на секој, насекаде ќе му се обезбеди пристап до квалитетни здравствени услуги без да се соочи со финансиски потешкотии“, се истакнува на официјалната страница на Светската здравствена организација.
Овогодишната кампања на Светскиот ден на здравјето, поддржан од Светската здравствена организација, го носи името „Universal health coverage: everyone, everywhere“ и преку серија настани ќе го стави фокусот на обезбедување на начини за овозможување на добро здравје за сите околу светот.
Зошто обезбедувањето на општа здравствена заштита е важно?
Земјите што инвестираат во општата здравствена заштита прават солидна инвестиција во луѓето. Во последниве децении, општата здравствена заштита се појави како клучна стратегија за постигнување напредок кон други здравствени и пошироки развојни цели. Пристапот до есенцијална квалитетна нега и финансиска заштита не само што го подобрува здравјето на луѓето и го зголемува животниот век, туку ги штити земјите од епидемии, ја намалува сиромаштијата и гладот, овозможува работни места, предизвикува економски раст и ја зголемува родовата еднаквост.
Што може да направи Светскиот ден на здравјето?
Некои земји веќе постигнаа значителен напредок кон обезбедувањето на општа здравствена заштита. Сепак половина од светското население сè уште не е во можност да ги добие здравствените услуги што му се потребни. Доколку целта на Светскиот ден на здравјето е постигната во останатите земји, речиси една милијарда луѓе ќе имаат корист од општата здравствена заштита до 2023 година.
Светскиот ден на здравјето во центарот на вниманието оваа година ќе ја стави потребата за општата здравствена заштита и предностите што може да ги донесе истата.
Цели на Светскиот ден на здравјето за 2018
Оваа година целта на Светскиот ден на здравјето е да:
- Инспирира – преку истакнувањето на моќта на креаторите на политиката за трансформирање на здравјето на нивната нација, нагласување на предизвикот како амбициозен и поканувајќи ги да бидат дел од промената.
- Мотивира – преку споделување на примери за тоа како земјите веќе напредуваат кон општата здравствена заштита и ги поттикнуваат другите да најдат свој сопствен пат.
- Води – преку обезбедување алатки за структуриран политички дијалог за тоа како да се унапреди општата здравствена заштита дома или да се поддржат таквите напори во други земји (на пример, проширување на покриеноста на услугите, подобрување на квалитетот на услугите, намалување на трошоците, итн.).
Пораки на Светскиот ден на здравјето
- Општата здравствена заштита подразбира осигурување дека сите луѓе можат да добијат квалитетни здравствени услуги, каде и кога им се потребни, без да претрпат финансиски потешкотии;
- Никој да не мора да избере помеѓу добро здравје и други животни потреби;
- Општата здравствена заштита е клучот за здравјето и добросостојбата на луѓето и нациите;
- Општата здравствена заштита е цел којашто е достижна. Некои земји постигнаа голем напредок во нејзиното обезбедување и нивниот предизвик е да ја одржат таа заштита за да се исполнат очекувањата на луѓето;
- Сите земји ќе пристапуваат кон општа здравствена заштита на различни начини. Иако не постои еден единствен начин кој води до нејзино подобрување, секоја земја може да направи нешто за да ја подобри состојбата на општата здравствена заштита;
- За здравствените услуги да станат навистина универзални, потребна е промена во концептот на здравствените системи и институции;
- Секој може да допринесе во обезбедувањето на општата здравствена заштита;
- Премногу луѓе во моментов не уживаат здравствено осигурување.
Факти за состојбата на општата здравствена заштита денес
- Најмалку половина од луѓето во светот во моментов не можат да добијат основни здравствени услуги;
- Речиси 100 милиони луѓе се втурнати во екстремна сиромаштија бидејќи мора да плаќаат за здравствени услуги од своите џебови;
- Над 800 милиони луѓе – речиси 12 отсто од светската популација, трошат најмалку 10 отсто од своите буџети за домаќинствата на здравствени трошоци за себе, за болно дете или за член на семејството.
