Имунизацијата спасува милиони животи и е широко признаена како една од најуспешните и најекономични здравствени интервенции во светот.
Светска недела на имунизација
Секој човек заслужува да биде заштитен од болести што може да се спречат со вакцинација и да игра клучна улога во заштитата на другите со тоа што ќе одбере да се вакцинира. Имунизацијата спасува милиони животи и е широко признаена како една од најуспешните и најекономични здравствени интервенции во светот. Сепак, во светот има повеќе од 19 милиони невакцинирани или недоволно вакцинирани деца што претставува сериозен ризик за заболување од сериозни болести.
Светската недела на имунизација којашто ќе се одбележи во текот на последната недела од месец април, од 24 до 30, има за цел да ги истакне колективните активности коишто се потребни за да се осигури дека секое лице е заштитено од болести што може да се спречат со вакцинација. Овогодишната тема којашто го носи името „Protected Together, #VaccinesWork“ има за цел да ги охрабри луѓето ширум светот да продолжат со нивните напори за зголемување на свеста за имунизацијата.
Цели на Светската недела на имунизација 2018
Целта на Светската недела на имунизација за 2018 година е да поттикне поголема акција за имунизација ширум светот со што ќе стави акцент на важноста на улогата што секој може да ја игра во оваа акција на индивидуално и колективно ниво.
Како дел од кампањата од 2018 година, Светската здравствена организација и партнерите имаат за цел:
- Да ја акцентираат важноста на имунизацијата;
- Да ја нагласат важноста на инвестирањето во имунизацијата;
- Да ги посочат начините на кои секој може и мора да го поддржи воведувањето на вакцинацијата.
Глобалниот акционен план за вакцини којшто беше одобрен од 194 земји-членки на Светската здравствена организација во мај 2012 година има за цел преку обезбедување на универзален пристап до имунизација до 2020 година да спречи милиони смртни случаи од сериозни болести.
Сепак, покрај напредокот со воведувањето на вакцини на глобално ниво, генерално се доцни со остварувањето на целите на глобалниот акционен план за вакцини за спречување на некои болести, меѓу кои и малите сипаници, рубеолата и мајчинскиот и неонатален тетанус.
За насекаде ширум светот да се оствари напредок земјите мора да направат повеќе заеднички напори за постигнување на целите на глобалниот акционен план за вакцини до 2020 година. Дополнително, оние земји кои постигнале напредок кон постигнување на целите мора да работат на одржување на истите.
Европска недела на имунизација
Паралелно со Светската недела на имунизација и Европа ќе ја одбележи Европската недела на имунизација од 23 до 29 април. Со цел да ја подигне свеста за важноста на имунизацијата за здравјето и благосостојбата на луѓето, оваа година Европската недела на имунизација ќе се фокусира на имунизацијата како индивидуално право и колективна одговорност.
Цели на Европската недела на имунизација 2018
Целта на Европската недела на имунизација 2018 е преку подигнување на свеста за важноста на вакцинацијата како поединечно право и заедничка одговорност да го поддржи создавањето на Европски регион без заболувања кои може да се спречат со вакцини.
Оваа тема ќе биде разработена преку материјали и активности насочени кон следниве клучни пораки:
- Вакцините служат за да ги заштитат луѓето на сите возрасти од потенцијално опасни болести;
- Секој човек заслужува да биде заштитен од болести што може да се спречат со вакцини и да игра витална улога во заштитата на другите со тоа што ќе одбере да се вакцинира;
- Консултацијата со лекарите е од голема важност кога станува збор имунизацијата на целото семејство за да се осигура целосна заштита од болести;
- Лажните информации можат да влијаат врз изборот и да ги загрозат животите. Споделувајте ги само информации што се засноваат на поткрепени докази;
- Подигнувањето на свеста за вакцините спасува животи;
- Правичниот пристап до имунизација е право на секој поединец и заедница;
- Со заштита на здравјето, имунизацијата помага во постигнувањето на целите за одржлив развој.
