sovremeniot-brz-nachin-na-zhivot-neretko-e-prichina-za-pojava-na-glavobolka_image
Споделете со пријателите!

Главоболка, мигрена, вртоглавица-што ги причинува?
„Докторе, имам болка и притисок во главата, како да сака да ми експлодира“, се чести зборови на пациентите кои доаѓаат на лекар барајќи помош. Некогаш им е многу тешко да ги опишат карактеристиките на своите тегоби, како што и на докторите им е некогаш тешко да ги разберат симптомите на пациентите. А што, всушност, ги карактеризира главоболките?

Поради современиот и брз начин на живот, се повеќе млади луѓе се соочуваат со проблеми со чести главоболки, мигрени и вртоглавици. Намалената физичка активност и седењето во неправилна положба во текот на денот дополнително им предизвикува и чести деформации на ‘рбетот.

Под главоболка се подразбира болка во главата, трајна или повремена, ретка или зачестена, дифузна која може да ја зафати целата глава или пак е локaлизирана на едно место. Таa претставува една од најчестите симптоми со кои се среќаваме во секојдневниот живот, но мошне често е и пропратен симптом на многу болести. Таа во секој случај ни алармира на нешто и затоа не е доволно само да испиеме таблета против болка, туку треба да посветиме особено внимание на целокупното наше здравје. Но, она што е важно е да знаете за каков вид на главоболка станува збор.

„Се смета дека 15-20% од сите луѓе патат од трајни главоболки или пак повремени главоболки.“

Се смета дека 15-20% од сите луѓе патат од трајни главоболки или пак повремени главоболки. Нејзината појава е најчеста во период од 25 и 65 години од животот, почеста е кај жени, во урбаната популација и популацијата на развиениот свет, но се повеќе се среќава и кај лицата чија професија побарува престој во затворени простории со седење, каде се неопходни поголем психички напор и концентрација. Иако главоболката е чест симптом, сепак во 90% од случаите е симптом на благо пореметување кое може релативно лесно да биде отстрането.

Повеќето лица кои страдаат од повремени главоболки, ги прифаќаат често како составен дел од животот. Обично тоа се луѓе кои страдаат од хронична главоболка или имаат помалку акутни силни главоболки со бурен почеток. Таквата силна главоболка може да биде сериозен симптом како и знак за сериозни и тешки болести, па таквите пациенти е потребно итно да бидат прегледани и во зависност од индикацијата некогаш и да бидат хоспитализирани за нивен понатамошен третман.

Но, што е всушност тоа што не боли во главата?

Болката, односно главоболката може да настане само во околните ткива или структури на главата кои имаат чувствителни(сензитивни)завршетоци за болка, а тоа се:kожата, поткожното ткиво, мускулите, апоневрозата, окото, забите, носната и усната шуплина. Некогаш е многу тешко да се одреди местото на главоболка, особено ако знаеме дека болката„се проектира“преку проекција на нервот кој ја пренесува, така што многу често локализацијата на болката може да го „маскира“местото на потекло.

Факторите кои доведуваат до појава на болка, односно до надразнување на нервните структури кои се чувствителни на болка може да бидат механички (притисок, истегнување), физички (промени на температурата, електрична струја) или, што е најчесто, хемиски (надворешни или внатрешни). Главоболката често се јавува и при промена на времето.

Многу од луѓето се вбројуваат во така наречениот збир на метеоропати, т. е. лица кои се особено чувствителни на промените на времето, т. е. промените на временските фактори и притисокот на воздухот, каде главоболката се појавува пред да започне промената на времето, посебно често кај нискиот притисок на воздухот, а ова покрај главоболка може да предизвика и промени на расположението, раздразливост, па дури и депресија.

Прочитајте:  Синдром на измамник

Мигрените се многу интензивни, треперејќи главоболки. Она што е типично за мигрената пак, е дека најчесто боли само едната половина на главата, примарно делот околу слепоочниците, а болката има карактеристика на пулсирање. Со нивно појавување можат да ја зголемат чувствителноста на светлина и бучава. Може да траат од неколку часа до неколку дена. Истражувачите веруваат дека тие може да бидат предизвикани од промени во активноста на нервните патишта и мозочните хемикалии. Се смета дека генетските фактори и факторите на животната средина влијаат врз чувствителноста на луѓето за развој на мигрена.

„Главоболката често се јавува и при промена на времето.“

Често главоболката може да се појави поради специфичната исхрана или одредените навики кај лицата кои нередовно се исхрануваат, кои се изгладнуваат и долго време се без храна или ги прескокнуваат своите оброци, посебно ако се на разни диети за слабеење. Неретко главоболките се поврзани и со земањето на поедини намирници кои го погодуваат настанокот на главоболката. Тоа е посебно чест случај кај мигрената, каде често се опишува поврзаноста на нападите на мигрената со одредена храна односно пијалок, како нејзин тригер.

Меѓутоа, потребно е да се јавите кај вашиот лекар ако се јави главоболка после траума на главата. Исто така, веднаш треба да се јавите кај вашиот лекар ако главоболка е придружена со следниве симптоми:поспаност, треска, повраќање, вкочанетост на лицето, нејасен говор, слабост во раката или ногата, конвулзии, конфузија.

Третманот за главоболка варира во зависност од причината. Ако главоболките се предизвикани од некоја болест, тогаш е веројатно дека главоболките ќе исчезнат откако ќе се лекува основната состојба. Сепак, повеќето главоболки не се симптоми на сериозни медицински состојби и можат успешно да се лекуваат со лекови.


Споделете со пријателите!