Дознајте кои се вообичаените знаци дека вашето дете е предмет на силеџиство и како да му помогнете
Речиси секое дете во текот на растењето и одењето на училиште се соочува со силеџиство. Овој чин на насилство е сè поприсутен помеѓу децата на училишна возраст и, оттука, е важно секој родител да поразговара и да го едуцира своето дете на оваа тема. Силеџиството и насилството помеѓу децата може да се појави на предучилишна или училишна возраст и често може да трае подолг период и да се манифестира на многу различни начини меѓу кои, најчести се промени во расположение, несоница, депресија. Кои се првите знаци на силеџиство помеѓу децата и како да му помогнете на своето дете?
Форми на силеџиство на училиште
Силеџиството помеѓу децата на училиште може да се забележи во повеќе форми: вербално силеџиство кое подразбира закани, именување со различни навредливи имиња и прекари; психолошко силеџиство кое подразбира ширење невистини, исмевање и избегнувањево друштво; физичко силеџиство кое подразбира тепање, туркање, крадење пари или лични предмети и сл. Многу е важно да се напомене дека секоја од трите форми на силеџиството претставува подеднакво трауматичен чин на насилство кај децата. Ефектите и последиците од силеџиството на училиште понекогаш може многу сериозно да се одрази на однесувањето на детето коешто било злоставувано, поради што е неопходно постојано да се разговара со нив и да се следи нивниот психички и физички развој.
Знаци дека вашето дете е предмет на силеџиство во училиште
Секое дете на различен начин се справува со силеџиството кое што го доживеало на училиште и оттука на различен начин го манифестира. Многупати децата умеат вешто да ги сокријат чувствата и последиците од силеџиството од своите родители. Вообичаено децата молчат заради срам или пак страв зошто мислат дека, доколку им се доверат на своите родители, инцидентот би се повторил и би биле предмет на исмевање кај своите соученици. Освен физичкото насилство коешто речиси секогаш има видливи физички знаци кај детето, другите две форми на силеџиство понекогаш се тешки за откривање, но вообичаено постои барем еден знак заради кој би можеле да се посомневате дека нешто не е во ред. Неколку знаци коишто можат да навестат дека можеби вашето дете се соочува со „другари силеџии“ на училиште се следниве:
- видливи рани и модринки;
- промени во расположението – ќутливост, пасивност, вознемиреност, загриженост;
- промени во однесувањето – безволност за учење и за правење работи кои претходно му биле омилени, измислување лаги за да не оди на уличиште;
- често плачење, мокрење во текот на спиење, несоница;
Совети за помош на вашето дете кое било предмет на силеџиство во училиште
Доколку се посомневате на некакви промени во однесувањето кај вашето дете, најпрво дајте му простор за разговор. Доколку воочите дека не сака да ви се довери, обидете се да најдете начин случајно да започнете вообичаен разговор со детето во кој ќе ја зачнете и темата „силеџиство“. Овде може да ви помогне било кој филм или ТВ-серија со приказна во која некое дете е предмет на исмевање или сл., кој би го гледале заедно. Следете ги реакциите на детето и потоа поразговарајте со него за филмот и за силеџиството на училиште. Откако ќе се ослободи и ќе почне да разговара со вас, дајте му до знаење дека, доколку тоа или некое негово другарче е предмет на било која форма на насилство во училиште, е многу важно да поразговара со некој за тоа, без разлика дали тоа би биле вие или друг возрасен човек како наставничката, училишниот психолог или ваш пријател во кој има доверба. Она што е најважно е да му се даде поддршка на детето за да се ослободи и да разговара кога има ваков проблем со своите другари и соученици.
