Помеѓу ризиците коишто на прв поглед не се очигледни, а можат значително да влијаат врз менталното здравје кај децата со прекумерна тежина е ризикот од силеџиство на училиште.
Понекогаш е вообичаено децата да размислуваат за тоа колку килограми имаат. Всушност да се биде дете или тинејџер со прекумерна тежина е тешко заради повеќе причини. Постојат очигледни здравствени ризици кај децата со прекумерна тежина, односно докажано е дека 60 отсто од овие деца се изложени на поголем ризик за дијабетес или кардиоваскуларни болести.
Дополнително, помеѓу оние ризици коишто на прв поглед не се очигледни, а можат значително да влијаат врз менталното здравје кај децата со прекумерна тежина е ризикот од вербално и физичко насилство на училиште коешто многумина ги сметаат за тривијални. Она што загрижува е фактот дека децата често заради срам успеваат да го скријат своето страдање, па е можно родителите и воопшто да не ги препознаат симптомите коишто може да вклучат промени во расположението, несоница или депресија.
Психолошките последици од стигматизацијата на децата со прекумерна тежина не можат да се преценат. Покрај намалувањето на самодовербата на детето, можна е појава на симптоми на депресија и самоубиствени мисли. Кај децата со прекумерна тежина е разбирливо да се повлечат во себе и почесто да се вклучуваат во самостојни активности, наместо да си играат со други деца. Ова се должи на стравот и срамот дека можеби ќе бидат понижувани и вербално нападнати.
Имено, голем број истражувањата покажуваат дека дискриминацијата и силеџиството врз децата со прекумерна тежина може да започне уште на предучилишна или училишна возраст. Една студија којашто вклучила деца на 5-годишна возраст откри дека голем број од децата кога опишувале дете со прекумерна тежина ги споменале зборовите „мрзеливо, валкано, глупаво и грдо“. Друго истражување покажло дека децата од 4 до 8-годишна возраст имаат помала веројатност да им помогнат на другарчињата со прекумерна тежина во секојдневните задачи, како што е собирањето на играчките. Трета студија објави дека речиси сите тинејџерки со прекумерна тежина биле изложени на вербално насилство во училиште.
Ако се посомневате дека вашето дете може да биде предмет на вербално или физичко насилство поради тежината, постојат неколку работи што можете да ги направите. Можеби првото најважно нешто што можете да го направите е да поразговарате со него и да го ислушате. Кога детето опишува еден проблем со којшто секојдневно се соочува, природно е да сакате да му кажете што треба да направи, но подобро е само да слушате без да давате совети или коментари, додека тоа не ја раскаже целата приказна. Во овие моменти од огромна важност е да му покажете на вашето дете дека го разбирате и се грижите со тоа што притоа ќе му дадете до знаење дека не поддржувате силеџиство. Можете да го прашате вашето дете дали би се согласило да поразговарате со одговорниот наставник, бидејќи на почеток тоа може да не се чувствува удобно да се зборува на оваа тема.
Доколку вашето дете ви се довери дека овие ситуации го натерале да посака да ја намали прекумерната тежина, поддржете го и кажете му дека ќе му помогнете во процесот. Кога родителот и детето се вклучени во процесот на избирање на здрава храна и активности, губењето на несаканите килограми станува полесно и позабавно. Понатаму внимателно следете го напредокот на вашето дете и промените во расположението и социјализацијата.
