Анестезиолозите и останатите медицински професионалци од брза помош работат под исто ниво на ментален стрес како и добро обучените војници и елитните спортисти, па токму затоа би требало да ја поминат истата обука за да ги задоволат тие екстремни барања, се зборуваше на неодамнешна средба на анестезиолозите
На средбата на анестезиолози од Колеџот за анестезиолози од Австралија и Нов Зеланд –Australia and New Zealand College of Anaesthetists во Мелбурн изминатата недела, Д-р Џеф Хили – Geoff Healy анестезиолог од Нов Јужен Велс и Д-р Марк Стејси (Mark Stacey) исто така анестезиолог од Кардиф во Велика Британија, изјавија дека менталниот тренинг за справување со високо стресни средини е користен како кај тренинзите на елитните спортисти, но и кај воените тренинзи. Тоа е тип на тренинзи од кој медицинските професионалци имаат голема придобивка.
Д-р Хили рече дека во неговиот спасувачки сервис со хеликоптер и во болницата во Сиднеј, тој започнал со мониторинг на отчукувања на срцето на спасувачкиот тим составен од анестезиолози, консултанти и болничари. Тој најпрво намерно ги доведувал под високо ментално оптоварување со помош на симулации и ги мерел нивните одговори пред и отпосле тие да ја поминат обуката за справување со екстремен ментален стрес.
„Ние забележавме дефинитивен тренд кон подобрување на перформансите и повисок рејтинг на субјективните перформанси со помош на вештините кои ги учиме“ – истакна Д-р Хили.
„Начинот на кој размислуваме има големо влијание врз нашиот исход при реализацијата на задачите, дијагнозите, моторните вештини и интеракцијата со другите луѓе“ – додава Д-р Хили. Д-р Стејси рече дека телесниот одговор на стресот е ист без разлика дали си олимписки спортист, војник или доктор. „Ние како искусни и високо обучени лекари, кои се справуваме со секојдневните околности на животот или смртта, во суштина сме како елитните спортисти“ објаснува Д-р Стејси.
„Ние можеме да ги подобриме нашите перформанси и да го подобриме начинот на кој се справуваме со стресните ситуации со високо когнитивно оптоварување, преку она што е веќе познато во областа на елитните спортови и преку воените обуки, што ги подготвуваат елитните војници за борба“ – додава Д-р Стејси.
Перформансите во услови на стрес се испитани, разгледани и подобрувани кај спортовите и војската низ цели три децении, вели Д-р Хили. „Со разбирањето на тоа како нашите тела се справуваат со стресот, ние можеме да научиме некои стратегии за контрола, а понекогаш истото да го искористиме во наша полза, за да ги подобриме нашите перформанси“ – потврдува Д-р Хили.
