Менструалниот циклус кај жената честопати е проследен со болки и тегоби кои што го отежнуваат извршувањето на секојдневните активности
Менструалниот циклус е природен биолошки процес што е многу важен дел од животот на жената. Менструалниот циклус е процес во кој се исфрлаат неоплодените јајце клетки од претходниот циклус. Времетраењето на менструалниот циклус се смета од првиот ден на последната менструација до првиот ден на наредната менструација. Со менструалниот циклус се случуваат различни физиолошки промени кај жената, кои што често се проблематични и влијаат на дневните активности. Три од четири жени се соочуваат со нормални менструални болки или грчеви за време на менструалниот циклус, додека една од десет жени се соочува со потешки менструални симптоми како постојана абдоминална болка којашто се шири кон грбот и нозете, гадење, повраќање, главоболка или дијареа. Иако, многу често овие менструални грчеви и тегоби се третираат со анелгетици, постојат повеќе природни лекови кои се ефективни и помагаат за нивно ублажување.
Чај од камилица, нане или ѓумбир
Ѓумбирот е растение што игра голема улога во намалувањето на предменструалните и менструалните тегоби, но и за регулирање на нередовните менструални циклуси. Топлите чаеви од камилица, нане и ѓумбир, делуваат смирувачки на абдоменот и ги ублажуваат менструалните болки, како и честото гадење. Редовно консумирајте чаеви од камилица, нане и ѓумбир во текот на целиот ден за време на менструалниот циклус за да ги ублажите грчевите и тегобите.
Рицинусово масло
Маслото од рицинус помага во ублажувањето на менструалните болки што вообичаено се чувствуваат во долниот дел на стомакот и понекогаш се шират кон грбот. Намачкајте се со рицинусово масло на долниот дел од стомакот и на грбот и обвиткајте се со памучна крпа врз која ќе ставите термофор, или едноставно, шише со топла вода. Рицинусовото масло во допир со топлина делува смирувачки и помага во ублажување на абдоминалните болки.
Физичка активност
Иако ќе ви звучи невозможно во моментот кога чувствувате силни менструални болки, физичката активност може навистина да ви помогне во нивното намалување. Секоја физичка активност ја поттикнува циркулацијата на крвта во телото и помага во ослободувањето на ендорфинот во крвта што стимулира намалување на болките во абдоменот.
Витамин Д
Според некои истражувања, се смета дека редовното внесување на витаминот Д пред и за време на менструалниот циклус, може значително да помогне во намалувањето на силните абдоминални болки и гадењето кај жените. Имено, менструалните грчеви се должат на простагландините кои придонесуваат за контракции и опуштање на мускулите и на крвните садови. Токму витаминот Д помага во намалување на синтезата на простагландините во организмот со што се намалуваат контракциите на матката и абдоминалните грчеви. Витаминот Д во изобилство го има во млечните производи.
