vnesot-na-kafe-zavisi-od-varijacijata-na-genite_image1
Споделете со пријателите!

Количеството на шолји кафе што ги пиеме секојдневно веројатно зависи од нашето ДНК, а не од навика, истакнува едно ново истражување
Наодите од оваа научна студија спроведена од д-р Никола Пајрасту (Nicola Pirastu) од Институтот „Ашер“ (Usher) од Универзитетот во Единбург, објавени се во зборникот Scientific Reports. Додека некои луѓе можат да уживаат во речиси неограничени количини кафе, на други доволна им е само една шолја наутро за да се расонат. Поранешните студии сугерираа дека овие разлики во количеството на консумирано кафе кај луѓето произлегуваат од разликите во начинот на кој телото на една личност реагира на кофеин, главниот стимуланс во кафето, но досега не беше позната точната причина за оваа појава.

Некои студии сугерираа дека одредени гени може да играат улога во различната потреба за кафе кај одредени луѓе. Студијата од 2014 година објавена во зборникот Molecular Psychiatry идентификуваше извесен број на генетски варијации поврзани со метаболизмот на кофеинот во организмот. Д-р Пајрасту и неговите колеги велат дека успеале да идентификуваат друга генетска варијација што објаснува зошто некои луѓе пијат помалку кафе од други.

За потребите на студијата биле анализирани генетските податоци на 1,213 луѓе од Италија. 

Сите испитаници биле анкетирани колку кафе пијат дневно. Тимот открил дека консумацијата на кафе била помала кај лицата кои имале генетска варијација, конкретно во генот PDSS2. Тие пиеле просечно по една или помалку шолји кафе дневно, во споредба со оние кои ја немале оваа варијација. Научниците на интересен начин ги објаснуваат механизмите кај оваа појава. Имено, тие сугерираат дека варијацијата во PDSS2 генот ја намалува способноста на клетките да го разложува кофеинот по консумирањето кафе. Ова го продолжува времетраењето на стимулансот во телото, така што овие луѓе имаат помала потреба од кафе.

„Холанѓаните внесуваат повеќе кофеин во споредба со Италијанците“

Во натамошните истражувања врз 1,731 испитаници од Холандија, истражувачите биле во можност да ги потврдат наодите, иако забележале дека разликата во количеството на испиено кафе не била толку голема во оваа група. Тимот шпекулира дека ова може да биде поради разликите во стиловите на пиење кафе кај овие две нации. Италијанците најчесто пијат помали шолји кафе, како еспресо, додека Холанѓаните почесто пијат поголеми шолји кафе што содржат повеќе кофеин.
vnesot-na-kafe-zavisi-od-varijacijata-na-genite_image

Прочитајте:  Кои пробиотски комбинации се најсоодветни за третман на дијареа

„Резултатите од нашата студија ги надополнуваат досегашните истражувања, коишто укажуваат дека нашата желба да пиеме кафе може да биде вградена во нашите гени. Ние треба да спроведеме поголеми студии за да го потврдиме ова истражување и исто така за да се разјасни биолошката врска помеѓу PDSS2 и консумирањето кафе“ – заклучува д-р Никола.


Споделете со пријателите!