Дознајте кои се новите трендови во полето на естетската дерматологија
Стареењето е неминовен животен процес од кој современиот човек сака да биде што подалеку. И покрај тоа што староста не може да се избегне, таа може да почека. Првите знаци на стареење се во форма на брчки што се појавуваат на лицето, особено во пределот околу очите и усните, односно во деловите со кои се изразува мимика.
Според трендовите во пластичната хирургија за 2016 година, минимално инвазивните процедури ќе бидат во пораст, пред сè заради брзите резултати и новите технологии на примена.
Бројните козметички третмани помагаат при ревитализирање на кожата со цел таа подолго да остане млада и витална. Одбирање на соодветен третман кој би бил успешен при процесот на подмладување, првенствено зависи од внимателната проценка, соодветно одредување на потребите на пациентот како и состојбата и видот на кожата. Најчесто користените техники за подмладување кои се користат, се комбинација од повеќе неивазивни техники кои што се фокус во овој текст.
Ботокс и дермални филери
Ботокс инјекциите ги израмнуваат линиите и борите околу очите. Процедурата ги парализира мускулите на челото, така што се намалува движењето на овие мускули. Можно е мало отекување и модринки и резултатите не се трајни. Вакви инјекции се повторно потребни после шест месеци. Ботоксот исто така се употребува и при третман на прекумерното потење, кое претставува проблем на многумина.
Дермални филери се пополнувачи на брчките на лицето. Еден од најупотребуваните супстанци за оваа намена е хијалуронската киселина, која е природна состојка. Оваа метода е двојно подолготрајна од ботоксот и нејзините ефекти траат до дванаесет месеци. Ботоксот и дермалните филери претставуваат растечки тренд за 2016 година.
Фракционен еC02 ласер
Фракциониот eC02 ласер е најсовремена технологија за подмладување и третман на недостатоците на кожата.
Делува преку невидливи оштетувања на кожата, при што направените оштетувања го стимулираат здравото ткиво во продукцијата на нов колаген. Се користи во третман на брчки, лузни од акни, темни кругови околу очите, подмладување на рацете, вратот и деколтето и ја враќа еластичноста на кожата. Исто така, погоден е за третман на стрии, стеснување на отворени пори, лузни од операција.
Пред и по третманот местото на третирање се лади со мраз. Првите два дена може да се појави црвенило или мал оток. Најзначајна карактеристика на овој третман е дека зафаќа 20 проценти од кожата, додека 80 проценти останува недопрена во подрачјето каде што се третира.
PRP (Plasma-Rich Platelet)
PRP третманот или популарно познат како вампирски фејслифтинг е метод којшто се состои од земање мала количина крв од пациентот, која се обработува и се аплицира повторно на пациентот.
Овој третман ја користи моќта на тромбоцитите од сопствената крв како би ги стимулирале матичните клетки да регенерираат одредено ткиво. Матичните клетки овозможуваат создавање на нов колаген, обновување на оштетената кожа и го успорува нејзиното стареење. Се користи за обновување на кожата, подмладување, затегнување на брчките и избелување на флеките на безбеден начин. Може да се користи и во комбинација со ласерски третман или пилинг.
