Како да се подготвите за ниските температури – да останете безбедни и да се заштите од несакани повреди на снегот и мразот
Зимата не е само едно студено годишно време во текот на кое треба да седите дома со вашите деца и да ја чекате пролетта и летото за да заминете на одмор. Ова годишно време подеднакво може да донесе радост и забава за целото семејство. Зимските патувања на кои вашето дете ќе научи да скија или борда, да се санка на снегот и да лигза на мраз се едни од најинтересните патувања што без сомнение ќе ве исполнат со среќа и ќе ви остават убави семејни спомени.
Она што е најважно за патувањето во зима со вашето дете е да се подготвите соодветно за студот, да останете безбедни и да се заштите од несакани повреди на снегот и мразот.
Соодветна зимска опрема
Добрата подготовка за ниските температури што ќе ве пречекаат каде и да заминете на зимско патување е есенцијална за вашето дете. Спакувајте доволно топла облека, водоотпорна опрема што ќе биде соодветна за снег и дожд, како и повеќе капи, шалови и ракавици што ќе може вашето дете да ги менува. Понесете удобни и водоотпорни зимски обувки и топли чорапи што ќе ги чуваат стапалата топли и суви по долгото играње во снегот.
Избегнувајте памучни материјали и понесете повеќе парчиња волнена облека бидејќи таа му дава значителна топлина на телото во студените зимски месеци. Проверете какви температури ве очекуваат и подгответе се за променливото време со облекување во слоеви. Децата често се потат кога си играат на снегот или скијаат, затоа не заборавајте секој ден да понесете екстра топла облека за пресоблекување, како и втор пар капа, шал и ракавици.
Крем за заштита од сонцето и ветрот
Сонцето може да биде опасно во зимскиот период бидејќи често е придружено со ветер заради кој не го чувствуваме на нашето лице. Прекумерната изложеност на студениот и сув ветер и сончевите зраци може да предизвика иритираност и изгореници на кожата на лицето.
Нанесете крем со заштитен фактор и кога е облачно.
Не заборавајте да понесете со себе крем за соодветна заштита (мин. SPF 15) од сончевите зраци, балсам за усни и очила за заштита на очите од силниот ветар на патувањето на кое вашето дете ќе минува долги часови скијајќи или санкајќи се на снегот. И кога е облачно времето нанесете од кремот бидејќи ултравиолетовите зраци продираат и низ длабоките облаци.
Подготовка за зимските спортови
Скијање и бордање
Скијањето и бордањето се забавни зимски спортови што може да бидат непредвидливи во некои случаи. Честото паѓање е неизбежен дел од овие спортови, особено на почетокот кога децата се учат да скијаат или бордаат. Планинските услови носат променливо време и температури придружени со дожд, снег, сонце, ветер и понекогаш магла, оттука, е многу важно постојано да бидете во близина на вашето дете и да не го оставате само. Подучете го детето да скија или борда полека и да внимава на камења и дрва затскриени од снег или магла за да не се повреди, и она што е најважно, обезбедете соодветна опрема за скијање или бордање вклучувајќи и заштитен шлем.
Санкање на снег
Санкањето е можеби најзабавниот дел од зимското патување за децата. Особено помалите деца, коишто сè уште не научиле да скијаат или бордаат, обожуваат да се лизгаат со санката на снегот. Но санкањето може да биде опасно доколку не се внимава на управувањето на санката. Доколку планирате прв зимски одмор на планина со вашето дете, подгответе се за санкањето многу порано со тоа што ќе му го објасните начинот на кој треба да се санка за да остане безбедно и да ги избегне опасностите.
Најчести опасности се неконтролирано и пребрзо санкање, превртување од санката или удар во друг санкач или скијач. Исто така, не заборавајте да обезбедите заштитен шлем за главата на вашето дете.
Лизгање на мраз
Слично како санкањето, лизгањето на мраз е еден од најзабавните зимски спортови што децата ги обожаваат. Доколку планирате зимско патување каде што вашето дете ќе има можност да се лизга на мраз, потребно е предвремено да се подготвите. Настрана од топлата и удобна облека, шалот, капата и ракавиците, кога го подготвувате вашето дете за лизгање на мраз не заборавајте задолжително да понесете заштитен шлем за главата, како и штитници за колената и лактите. Една од најважните работи на кои треба да се внимава при лизгањето на мраз е паѓањето кое може да биде многу болно и придружено со несакани скршеници заради цврстината на мразот. Подучете го вашето дете на почеток секогаш да се лизга придржувајќи се до заштитните огради и секогаш да внимава да го заштити лицето доколку почувствува дека губи рамнотежа и паѓа.
Зимска патувачка аптека:
- за заштита од сонце и ветер (крем SPF 15), балсам за усни, крем за изгореници);
- за заштита од повреди (завој, фластери, стерилни гази, средство за дезинфекција на рани);
- за заштита од настинка (аналгетици, спреј за нос и грло, средство за намалување на температура);
- за заштита од стомачен вирус (средство против мачнини, повраќање и дијареа).
