Зголемената телесна температура претставува еден вид одбрана на организмот од инфекции и од други болести
Гори од температура!!!
Центарот за терморегулација во мозокот е сличен на термостатот на електричните апарати, подесен е на нормална вредност од околу 37 Целзиусови степени. Кога сме болни, вредноста се зголемува и, на пример, достигнува до 39°C. Додека не се достигне таа температура, чувствуваме дека ни е ладно и покрај тоа што „гориме“.Најчесто високата температура не предизвикува сериозни компликации, но доколку е повисока од 38°C и не се симнува со вообичаените постапки, а, згора на тоа, е проследена и со други симптоми како кашлица, тешко дишење, пролив и повраќање, но тоа е знак оти веднаш треба да се побара лекарска помош.
Причини за развој на температура
Вирусната и бактериската инфекција, како и растот на првите запчиња, се најчестите причини за зголемена телесна температура кај децата.
Вирусите најчесто не претставуваат голема опасност и во тој случај антибиотиците не помагаат, туку инфекцијата треба да помине сама од себе. Додека, кај бактериските инфекции, како воспаление на ушите, на мочниот меур, пневмонија и воспаление на грло предизвикано од стрептококи, се лекуваат со антибиотици.
Првите заби може да предизвикаат повисока температура, но никогаш не повисока од 38 степени. Во тој период децата често ставаат различни предмети во уста, а со тоа може да соберат и по некој вирус или бактерија.
Температура до 38,3°C не мора да се симнува!
Кај здраво дете телесната температура не мора секогаш да биде 37°C. Таа варира и обично наутро е најниска, а доцна попладне е највисока. Исто така, активноста кај малите деца, како, на пример, скокањето, може да ја зголеми телесната температура и до 37,7°C.
Температура пониска од нормалната, како 36,1°C, понекогаш се јавува на крајот од болеста, а кај здрави бебиња во раните утрински часови. Но, тоа не е причина за загриженост, се додека детето се чувствува добро.
Температурата до 38,3°C не мора да се симнува. Таа може да ги уништи некои од микроорганизмите што го предизвикале воспалението.
Висината не температурата не укажува на тежината на болеста. Децата на возраст од една до пет години може да имаат висока температура и до 40 степени, а да се работи за некоја лесна болест, настинка или воспалено грло. Од друга страна, има многу посериозни болести што не се проследени со температура повисока од 38,3°C.
Затоа, ако детето ви изгледа болно, треба да се однесе на лекар без разлика дали има температура или не.
Разладување
Ако температурата е многу висока, околу 40 Целзиусови степени и детето се чувствува лошо, дајте му лек за да ја намалите пред да го однесете на лекар, особено ако знаете дека нема да биде прегледано во рок од еден час или повеќе.
Доколку од високата температура на детето му се зарумени лицето, треба да се легне на собна температура, лесно да се покрие и внимателно да се следи неговото дишење, свесноста и промената на бојата на кожата.
При покачена температура, децата, а особено помалите, многу лесно можат да дехидрираат, односно да ја загубат водата од телото преку испарување од кожата. Таквата состојба уште повеќе ја покачува температурата и затоа е многу важно детето да пие многу течности.
Особено треба да се внимава кога се работи за новороденчиња и мали деца бидејќи кај нив болеста понекогаш се развива многу брзо, па дури и во рок од неколку часа.
Температурата повисока од 39 степени предизвикува чувство на немоќ, главоболка, понекогаш грчеви и други сериозни компликации. За да се намали, Д-р Камењарски ги советува родителите да го стават детето во кадичка наполнета со млака вода околу три прста и да му го ладат телото на секои две-три минути, освен лицето и главата. Температурата се мери на секои 15 минути, а постапката со разладувањето продолжува се додека температурата не падне под 38 степени. Доколку и на тој начин не се снижи температурата, на детето треба да му се даде лек, антипиретик од парацетамолски тип.
Детето може да се обвитка од вратот до петиците со крпа или со пелена намокрена во млака вода и одозгора да се покрие со подебела и сува крпа и така да се држи околу десет минути.
Родителите треба да ги облекуваат полесно децата во случај на висока температура или едноставно да ги остават голи.
Температурата во собата треба да биде околу 20 степени, а потењето преку покривање како начин да се намали телесната температура се покажува како многу штетна и ризична појава бидејќи, спротивно од тоа што се мисли, на тој начин се ризикува детето да добие повисока температура.
Брзото ладење предизвикува грчеви
Температурата треба да се спушта постепено бидејќи наглото спуштање може да предизвика температурни грчеви. Ако конвулзиите не се појават првиот ден, постои мала веројатност дека детето ќе ги добие следниот ден. Грчевите се посебни мозочни напади кои се јавуваат при висока телесна температура што не е предизвикана со акутна инфекција на мозокот и на мозочните обвивки.
Тоа се контракции на скелетната мускулатура на целото тело, при кои се вкочанува погледот на детето и се губи свеста. Траат помалку од 15 минути, а најчесто 3-5 минути. Не постои опасност од задушување бидејќи низ стиснатите заби детето дише без проблем. Во оваа состојба устата на детето не треба да се отвора насила затоа што грчот на вилицата е многу силен и само може да се предизвика некоја повреда.
Конвулзиите се појавуваат кај деца од шест месеци до деца со навршени 3-5 години. Често се повторуваат во текот на една година од нападот и почесто ако првиот напад е во тек на првата година од животот на детето. Кај најголемиот број обични температурни грчеви нема потреба од постојана терапија.
На децата што еднаш добиле вакви напади секогаш при покачена температура превентивно им се дава таблета „дијазепам“ чие дозирање е во тесна врска со возраста и тежината на детето.
Типични температурни грчеви се појавуваат кај деца на возраст од шест месеци до четири години, траат најдолго 20 минути, а може да се повторат само еднаш. Атипичните грчеви се јавуваат кај деца помали од шест месеци и постари од четири години, може да се повторат неколку пати и траат повеќе од 20 минути.
Третман на фебрилноста
- Едукација на родители;
- НЕ-антибиотици кај нејасна етиологија на фебрилноста;
- Кога да се користат антипиретици?
- Кај покачена температура над 38,5°C;
- Иритираност и со чувство на непријатност дури и при покачена температура под 38,5°C.
Нефармаколошки методи за контрола на фебрилноста!
- Ниска температура на околината;
- Отстранување на вишокот на облека;
- Масажа со млака вода;
- Земање на доволна количина на течности.