Откриено имуно антитело што може да ги подобри вакцините за грип

Наодите од ново револуционерно истражување изјавуваат дека е откриен тип на имуно антитело коешто може многу брзо да се развива и да неутрализира широк спектар на разни видови на вируси на грип 

Истражувачите од Институтот за рак Dana-Farber ја потврдуваат способноста на телото да произведе соодветни антитела и сугерираат на потенцијалните стратегии за создавање на подобрени или пак, универзални вакцини против грип. Истражувањето е предводено од д-р Вејн А. Мараско – Wayne A. Marasco имунолог и виролог при институтот, а наодите се објавени во зборникот Nature Communications. Ова антитело може да препознае и да спречи голема и разнообразна група од 18 различни врсти на вирусот на грипот што се најраспространети ширум светот.

Новооткриениот протеин што се бори со инфекциите е наречен 3I14 mAb и претставува антитело со широк спектар на неутрализирање.

Според новиот извештај се покажа способноста на антителото 3I14 да ги неутрализира двата главни типа на вирус А на грипот, групата 1 и 2 и ги заштити глувците од смртоносните дози од вирусот. Ова антитело е создадено од страна на т.н. мемориски Б клетки („memory“ B cells) од човечкиот имун систем, односно белите крвни клетки што кружат во крвта, а потекнуваат од слезината и коскената срцевина. 

Кога пациентот е изложен на инфективен агенс или пак, инјектирана му е вакцина направена од делови од тој агенс, белите крвни клетки што реагираат на напаѓачот може да создадат меморија од тој конкретен тип на вирус. Базените на овие мемориски Б клетки претставуваат резервна одбранбена сила која може брзо да го препознае и да го нападне микробот или вирусот кога повторно ќе навлезат во телото.

Ова истражување е патот кон создавање на подобрени или пак универзални вакцини против грип

За разлика од повеќето инфективни агенси што можат да бидат сузбиени со само една универзална вакцина, инфлуенца вирусот е вирус кој постојано ја менува својата форма и мутира, а исто така може да се комбинира и со други вируси на грипот од животните и птиците. Мутацијата се јавува за време на секоја нова сезона на грип. Подраматичните промени што се јавуваат кога новите типови на вируси се распространуваат од животните и птиците, како што беа случаите изминатите години, со птичјиот и свинскиот грип.

Откритието на новото антитело со широк неутрализациски спектар се случи откако Д-р Мараско и неговите колеги земаа примероци од крв од седум донатори на крв коишто имале присуство на овие видови на антитела. Истражувачите експериментирале со Б клетките од примероците на крвта од испитаниците во лабораторија со низа на видови на вирусот на грипот. Тие откриле дека една конкретна популација од Б клетките ги препознава сите видови на грипот со кои тие биле нападнати, па сортирајќи низ ДНК на Б клетките, истражувачите го изолирале генот кој ги носи упатствата за 3I14 антителата.

Истражувачите ги нападнале Б клетките од примероците на крвта со птичјиот грип од типот H5 којшто имуните клетки никогаш не го сретнале. Додека овие новоотркиени антитела не се врзуваат силно за вирусот, истражувачите вовеле единствена мутација во ДНК структурата – промена на само една буква од генетскиот код – што ја зголемила врзувачката сила кон вирусот H5 за 10 пати.

„За среќа, направивме само една мутација и таа ја заврши својата работа. Тоа беше едноставна мутација која лесно може да се случи и во природата“ – објаснува д-р Мараско.

Според него, она што овие податоци сугерираат е дека мемориските Б клетки од имуниот систем може постојано да се менуваат со мутации. Како резултат на овој механизам Б клетките „може да имаат утврдена имунолошка меморија која може да ги препознае сите видови на вируси од сегашноста и иднината“ – заклучува тој.