sekvencioniranjeto-na-chovechkiot-genom-stanuva-podostapno_image
Споделете со пријателите!

Секвенционирањето на геномот денес чини помалку од 1.000 долари, што оваа услугава ја прави ценовно поблиску до поголем број луѓе
Не толку одамна се случи првото секвенционирање на човечкиот геном во историјата и тогаш ова научно достигнување беше громогласно поздравено од светската научна фела. И покрај многуте години поминати во истражувања, потребна била и голема финансиска поткрепа, односно сума од околу три милјарди американски долари.

Оттогаш, брзите напредувања во генетската технологија и техника, драстично ја намалија цената на оваа лабораториска услуга. На почетокот на овој месец целосното секвенционирање на геномот за клиенти од страна на американската компанија Veritas Genetics чини само 999 долари. Нивната услуга наречена myGenome вклучува дигитален извештај на целиот геном, апликација за интеракција со податоците, како и помош при толкувањето на податоците и советување преку видео-конференции. Оваа услуга моментално е достапна за жителите на САД и одобрувањето од страна на лекар е задолжително. Предностите од секвенционирањето на геномот се големи.

Покрај запознавањето со моменталната здравствена состојба, дознавањето на потенцијалните идни здравствени проблеми, може да се дознае и што од наследната генетика може да биде пренесено на идните поколенија.

sekvencioniranjeto-na-chovechkiot-genom-stanuva-podostapno_image1„Вашата целосна геномичка низа ќе ве одведе кон многу подобро разбирање на она што ве прави да сте вие. Денес, како и низ годините што ќе доаѓаат“ – пишува на официјалната страница на компанијата чија цел е трансформирање на здравството. „Нашиот прв чекор е ставањето на моќта на генетиката во ваши раце. Колку повеќе знаете за себе, толку повеќе науката и медицината можат да напредуваат во борбата против болеста“.

Прочитајте:  Што се капкови инфекции и како се пренесуваат?

За многумина, лесната достапност на секвенционирањето на геномот може значително да ги намали трошоците за другите комерцијални и делумни генетски испитувања. Сепак и покрај предностите, жестока е јавната расправа за тоа колку овие персонализирани генетски податоци се употребливи во однос на подобрувањето на здравјето кај здравите лица.

Од една страна многу параноични здрави луѓе ќе сакаат да прават „превентивни“ операции по популарниот пример наречен „Ефектот на Анџелина Џоли“. Актерката откако изврши испитување на својот геном одлучи да изврши мастектомија на двете дојки само заради тоа што била изложена на поголем ризик од појава на рак на дојка. Од друга страна пак, научниците сè уште целосно не ја разбираат улогата на гените кај многу болести и сè уште целосно не го разбираат генетскиот код.

Според Veritas Genetics клиентите на нивната услуга не треба да се фокусираат на она што податоците не можат да им го кажат, туку на она што податоците можат да им го кажат.

Но, како што науката напредува со неверојатно темпо, потребни се понатамошни истражувања за да дознаеме што сè нашиот личен код може да ни каже. Од трета страна пак, се поставува и прашањето: дали навистина би сакале да ги дознаете сите информации за вас?


Споделете со пријателите!