Жена од Калифорнија со имплантиран чип во нејзиниот мозок успешно пребарувала на интернет користејќи таблет напојуван со нејзините мисли, што ги приближи научниците поблиску кон помагање на парализираните лица да станат дел од модерното општество
Заедно со напредокот на науката, техниката и технологијата, и до неодамна невозможното станува возможно. Општеството, со цел да ги вклучи лицата со посебни потреби да не се чувствуваат отфрлено и да можат да живеат нормален живот, создава уреди што им помагаат на лицата со инвалидитет да се движат, како на пример новиот уред Tecla Shield. Компјутерската технологија што се поврзува со мозокот, т.е. мислите (мозочните импулси) веќе помогна на парализиран човек да прооди, меѓутоа сега станува збор за уште позачудувачки изум.
Жената позната како „учесник во клиничкото испитување T6“ боледува од амиотрофична латерална склероза – Amyotrophic Lateral Sclerosis, болест што е позната и под името болест на Лу Гериг – Lou Gehrig’s disease. Таа може да зборува, да ракува со предмети и да се движи во инвалидска количка, но нејзиното терминално заболување најверојатно ќе ја доведе до целосна парализа.
Научниците се надеваат дека токму со овој обид ќе откријат како можат да им помогнат на парализираните пациенти да комуницираат преку програмирање на компјутери што ќе го читаат нивниот ум.
Испитаничката „Т6“се согласи научниците да вградат микрочип во нејзиниот мозок, во делот одговорен за движењата со раце, како дел од клиничкиот обид наречен BrainGate 2. Научниците ја поврзале главата на жената со компјутер што ги чита мислите. Потоа тие ја замолиле таа да замисли како го движи својот показалец лево и десно на таблетот Nexus 9 со Андроид оперативен систем, додека нејзиниот палец оди надолу и нагоре.
На тој начин таа успешно успеала да пребарува на интернет совети за градинарство, конкретно за орхидеи. Таа испраќала електронски пораки (e-mail) и отсвирила мелодија користејќи соодветна апликација. „На многу начини, тоа е како контролирање на џојстик од конзола за видео игри, но со помош на умот, наместо со помош на прсти“ – објаснува Нујуџикиен.
На годишната конференција за неврологија – Society for Neuroscience Conference што се одржа на 21 октомври во Чикаго, постдокторскиот истражувач од Стенфорд, Пол Нујуџикиен – Paul Nuyujukian, одржа презентација што ја претстави „Т6“ како успешно ракува со таблет со помош на оваа нова технологија.
Тие употребиле Bluetooth конекција и Нујуџикиен објаснува дека технологијата е потполно иста со онаа што ги напојува безжичните компјутерски глувчиња.
Пред да го спроведат обидот со таблет, научниците развиле прилагоден софтвер со виртуелна тастатура, што им овозможувало на испитаниците да го движат курсорот и да пишуваат пораки со помош на нивните мисли. Истражувачите успеале да ги реплицираат резултатите од нивното истражување и на друг испитаник. Сепак, Нујуџикиен како и секој научник, е малку скептичен кон ова откритие и тврди дека не е сигурен дали оваа технологија ќе има реална медицинска примена, поради тоа што технологијата е во фаза на тестирање на нејзината безбедност, па затоа сè уште е премногу рано да се зборува со сигурност.
„Ова сè уште е само истражувачка студија во голема мера“ – вели Пол Нујуџикиен. „Не постои импликација од клиничка корист“ – додава тој.
Доколку следните обиди се покажат како успешни, истава технологија ќе им овозможи на парализираните лица да контролираат роботски рамења и други протези со помош на нивните мисли. Нујуџикиен исто така е свесен дека секоја технологија што има потреба од операција на мозокот има ограничен потенцијал за општо прифаќање од страна на луѓето.
