Инвалидска количка која се качува по скали [ВИДЕО]

Нов вид на инвалидска количка која ќе ги олесни проблемите со недостапните места

Дизајнот на инвалидските колички не се сменил многу од моментот кога луѓето за прв пат се запознале со оваа направа. Воглавно, се работи за седиште со две тркала, а може да има и потпирачи за нозете како и рачки на задниот дел за некој друг да може да помогне во туркањето на количката. Лицата кои имаат потреба од инвалидска количка честопати се соочуваат со недостапни места, како на пример скали.

Домот во кој живее лицето со посебни потреби може да биде изменет за да може лесно да се користи инвалидската количка, но тоа е долг и скап процес кој што може да биде избегнат благодарение на еден нов вид на инвалидска количка.

Недостапните места, каде што во нормални услови би требало да има рампа, не претставуваат проблем за овој нов вид на инвалидска количка. Всушност станува збор за т.н. Scalevo инвалидска количка која била измислена од група на 10 студенти – Swiss Federal Institute of Technology; Zurich University of the Arts. Новиот вид на инвалидска количка работи на сличен начин како и сите други колички кога е на рамна површина. Користи две тркала со кои одржува рамнотежа, а личноста што седи може да го контролира движењето со наведнување нанапред или наназад.

Но, оваа количка може да се сврти на самото место за да смени насока на движење а за недостапните места, како на пример скали, количката користи две гумени траки кои личат на траките со кои се движи тенк. Според тимот кој го направил овој изум, само со допир на едно копче количката може да се качува по скали.

Тие додаваат дека гумените траки се доста безбедни дури и ако се движите по нерамни скали. Тие се приспособуваат на самите скали и всушност изгледа како да се качувате по рампа, а не по скали затоа што приспособувањето е совршено. Гумените траки се безбедни и нема опасност од лизгање. Освен качување по скали до местото каде што сакате да се искачите, количката може да се сврти и да преминете кон симнување по скалите. На инвалидската количка има и камера со чија помош може да се види што има под количката и пред неа.

Секој процес е автоматизиран, односно единствено што треба да направите е да се доближите до скалите, да притиснете едно копче и да ја контролирате брзината со која ќе се качувате. Количката автоматски се приспособува на скалите, а секој потег може да се види со помош на камерата.

Тимот кој ја направи оваа инвалидска количка се надева дека еден ден луѓето ќе се свртат кон нивниот изум наместо кон целосно приспособување на домот или просторот за работа кон стандардниот тип на инвалидска количка. Исто така, додаваат дека кога нивниот изум ќе се најде пазарот неговата цена ќе биде само малку повисока од стандардниот вид на количка.