Новите сознанија за човечките клетки на кожата нудат појаснување на процесот на стареење на кожата, а воедно нудат нови начини за развој на лековите и другите третмани за спречување на оваа природна и неминовна појава
Научниците од Универзитетот во Њукесл – Newcastle University, Велика Британија, за прв пат до сега откриле дека активноста на клучниот метаболички ензим кој се наоѓа во човечките клетки на кожата, се намалува со текот на времето, односно со возраста. Студијата што е објавена во Зборникот за истражувачка дерматологија – Journal of Investigative Dermatology откри дека активноста на митохондријалниот комплекс II значително се намалува кај постарата кожа.
Активноста на комплексот II била мерена кај 27 дарители, на возраст од шест до 72 години, а примероците биле земени од кожа од дел од телото што е заштитен од изложеност на сонце. Ова откритие уште повеќе ги доближува експертите кон развитокот на моќни препарати против стареење на кожата што ќе можат да делуваат врз активноста на одговорниот ензим. Новите сознанија може да доведат и до подобро разбирање на тоа како другите органи во телото стареат, што може исто така да биде почеток на развојот на нови лекови против болестите поврзани со стареењето.
Професорот по молекуларна дерматологија од Универзитетот во Њукесл, Марк Бирч Мачин – Mark Birch Machin ја предводеше студијата заедно со научниот соработник од Институтот за клеточна медицина од истоимениот универзитет д-р Ејми Боуман – Amy Bowman од неговата истражувачка екипа.
„Како што нашите тела стареат, ние гледаме дека батериите во нашите клетки се трошат, познато како намалена био-енергија, додека пак штетните слободни радикали се зголемуваат“ – истакнува д-р Марк.
Д-р Марк објаснува дека овој процес се манифестира со брчки на кожата. „Нашата студија за прв пат покажа дека во човечката кожа со текот на возраста постои специфично намалување во активноста на клучниот метаболички ензим откриен во батериите на клетките од кожата“ – додава тој. Овој ензим е алката помеѓу двата важни начини за правење енергија во нашите клетки и намалувањето на неговата активност доведува до намалување на био-енергијата во кожата што старее. „Универзитетот Њукесл е пионер за истражувањата околу стареење, затоа што долго време се сметаше дека митохондриите играат важна улога во процесот на стареење, сепак вистинската улога не беше јасна“ – додаде д-р Боуман.
Сега постои можност за пронаоѓање на третмани против стареење што ќе можат да бидат скроени соодветно според староста и пигментацијата на кожата.
„Нашето откритие значи дека ние сега имаме специфичен биомаркер или цел за развој на третманите против стареење и козметичките креми што можат да се спротивстават на падот на био-енергијата“ – вели д-р Марк. Понатамошните студии се неизбежни за целосно да се разберат функционалните последици во кожата и другите ткива и за да се утврдат најсоодветните стратегии против стареењето на човечката кожа.
[interaction id=”575abead245d1126132c7c2e”]
