Здравјето треба да нѝ биде на прво место. Прочитајте како да ги препознаете знаците дека нешто не е сосема во ред и преземете ги потребните мерки.
Ракот на простатата е еден од најчестите видови на рак кои може да се појават кај мажите. Ракот на простатата може да не биде забележан во рана фаза. Ако знаеме кои се знаците кои можат да н предупредат за напредокот на ракот како и кој е начинот на кој можеме да си помогнеме, тогаш можеби ќе бидеме неколку чекори пред оваа болест. Еве кои се знаците, односно симптомите на кои би требало да обрнеме внимание за да не дозволиме ракот уште повеќе да се прошири.
Симптоми за рак на простата
За жал, симптоми кои би н предупредиле дека се соочуваме со рак на простатата во рана фаза може воопшто да не се појават. Кога симптомите ќе почнат да се забележуваат, тоа би можело да значи дека ракот веќе напреднал. Доколку забележите некои од следните знаци, најдобро би било да се консултирате со лекар за понатамошни испитувања:
- Постојана потреба за уринирање, особено навечер;
- Потешкотии поврзани со контролирањето на уринарниот млаз;
- Слаб, односно испрекинат, млаз;
- Испуштање на урина при смеење или кашлање;
- Неможност за уринирање во исправена положба;
- Чувство на печење или болка при уринирање или ејакулација;
- Крв во урината или спермата.
Овие симптоми се појавуваат како резултат на блокадата што ја прави ракот (израстокот) во простатата, но исто така може да се појават поради состојба на зголемена простата – БХП или пак инфекција на уринарниот тракт. Затоа се препорачува консултација со лекар за понатамошни испитувања.
Следните знаци, пак, може да укажуваат на рак на простата кој можеби е во напредна фаза:
- Длабока болка или чувство на вкочанетост во пределот на карлицата, долниот дел на грбот, ребрата или пак болка во коските во овие делови на телото;
- Губење на тежина и апетит, умор, гадење или повраќање;
- Отекување на долните екстремитети;
- Чувство на слабост во долните екстремитети, често проследени со констипација;
- Еректилна дисфункција.
Следен чекор – консултација со лекар
Доколку ги земеме во предвид сите видови на симптоми, обратете се на лекар ако чувствувате потешкотии или болка при уринирање. Лекарот треба да изврши преглед на простатата за да види дали станува збор за зголемена простата, инфицирана простата или пак за рак на простатата. Исто така, консултацијата со лекарот треба да ви биде приоритет доколку се соочувате со хронична болка во долниот дел на грбот, карлицата или коските во тие делови на телото. Болката може да биде предизвикана од различни работи, а ракот на простатата е меѓу нив. Губење на тежина, отекување на нозете, слабост во нозете или потешкотии при одење проследени со констипација се само уште еден показател дека е потребен лекарски преглед.
