Мерки за прва помош при дехидратација

Дехидратацијата е состојба кој подразбира прекумерна загуба на течности во телото.

Општо познато е дека водата е неопходна за правилно функционирање на човечкиот организам. Речиси 70% од телесната тежина на човекот отпаѓа на вода и е вклучена во скоро сите процеси во телото. Со оглед на тоа што водата континуирано се троши преку дишење, потење и уринирање, од витална важност е да обезбедиме секојдневен континуиран внес на течности. При тоа потребата на телото од течности се зголемува со зголемување на активноста и генерално сите луѓе треба да внесуваат 2-3 литри течност секој ден.

Дехидратацијата е состојба кој подразбира прекумерна загуба на течности во телото. Дехидратацијата може да се сретне на било која возраст, но е најопасна кај мали деца а особено во доенечка возраст, и кај старите лица.

Кои се најчести причини за појава на дехидратација?

Дијареа предизвикана од бактерии или вируси. Почести се вирусните инфекции, а кај малите деца и доенчиња пред се ротавируси. Бактериските инфекции се почести во летните месеци и при патувањата. Најчести причинители се: Salmonella, Campylobacter jejuni, Shigella и Escherichia coli.

• Повраќање;
• Зголемена телесна температура;
• Недоволен внес на течности или прекумерно потење (спортисти);
• Често мокрење;
• Прекумерен внес на алкохол;
• Изгореници и други значајни оштетувања на кожата.

Кои се симптомите на дехидратација?

• Жед и сувост во устата;
• Главоболка;
• Малаксаност, поспаност и вртоглавица;
• Слабост во мускулите;
• Запек;
• Намалено производство на урина која е со силна жолта боја;
• Отсуство на солзи и потење;
• Намален крвен притисок и тахикардија.

Мерки за прва помош при дехидратација

Треба да се спроведе брза перорална рехидрација во период од 3-4 часа, и што побрзо да се воспостави нормална исхрана.

• Одмарајте и не се изложувајте на физички напори;
• Зголемете го внесот на чиста вода, хербални чаеви или бистри супи за да се надополнат течностите кои се изгубени;
• Започнете со внесување на орални рехидратациски соли (ОРС). Овие раствори ги надополнуваат изгубените екетролити пред се: натриум (Na+), калиум (K+), калциум (Ca2+), хлориди (Cl−) како и јаглехидрати. Употребата на овие раствори се прави голтка по голтка со временски интервали од 5 минути;
• Решете го причинителот за дехидратацијата! Ако имате висока температура намалете ја со млаки тушеви и/или антипиретици и не се преоблекувајте;
• Доколку дехидрацијата е предизвикана од дијареа корисно е да се внесуваат и пробиотици збогатени со цинк и витамин Б6 за да се намали губитокот на вода;
• Доколку дехидратацијата е предизвикана од дијареа и/или повраќање кои се перзистентни и не можеме да извршиме правилна рехидратација по орален пат обратете се на лекар;
• Доколку кај бебињата ако нема ниту една мокра пелена во рок од 8 часа, треба веднаш да се побара медицинска помош.