na-decata-ne-treba-da-im-bide-dozvoleno-koristenje-mobilni-telefoni-vo-krevet-dodeka-jadat_image
Споделете со пријателите!

Јасно е дека некои од содржините што ги гледаат младите на интернет, коишто се про-анорексија, самоубиство или самоповредување, може да бидат екстремно штетни.
Експертите и медицинските лица во Велика Британија ги повикуваат родителите да се осигураат дека времето што децата го поминуваат на мобилните телефони, компјутери и таблети да не го попречува нивниот сон, јадење, вежбање или учење.

„Електронските уреди не треба да ги попречуваат активносите  на децата!“

Медицинските работници објавија препораки за мерките што треба да ги преземат родителите во однос на времето коешто нивните деца го поминуваат пред екраните, вклучувајќи забрана на децата да ги земаат своите уреди во кревет или да ги користат за време на јадење.

Новите препораки беа прегледани од комитетот за наука и технологија, кој ги проценуваше доказите за влијанието на екраните врз детското ментално здравје и благосостојба. Прегледот покажа дека зголемената употреба на социјалните медиуми е поврзана со двојно зголемување на ризикот за развој на симптоми на депресија.

Имено, девојчињата и момчињата тинејџери кои поминале повеќе од пет часа дневно на социјални медиуми, 38,1 отсто, односно 14,5 отсто, страдале од депресивни симптоми, во споредба со 18,1 отсто, односно 6,8 отсто од оние кои трошат помалку од три часа на истите.

Во прегледот, исто така, се наведува дека сè уште не постојат доволно докази за да се направат конкретни препораки за дневните граници за времето поминато пред екраните. Сепак, упатствата советуваат родителите да бидат претпазливи и да го ограничат времето кое децата го поминуваат на екраните на не повеќе од вкупно два часа во денот.

Прочитајте:  Совети како да разговарате со вашето дете за некој трагичен настан

Даме Сали Дејвис советува дека децата треба да се одмораат од користење на такви уреди на секои неколку часа, како и да бидат внимателни со користењето на мобилниот уред, како и со споделувањето на фотографии на социјалните медиуми. Таа, исто така, повикува компаниите за дигитална технологија да вложат повеќе напори за да спроведат ограничувања на возраста кога станува збор користењето на различни онлајн-сервиси и услуги.

„Технологијата е неизбежен аспект на модерниот живот и технолошките компании имаат обврска да се грижат за своите корисници. Тие мора да вложат повеќе напори за да ги заштитат своите корисници од штети, особено децата и младите“, истакнува Даме Сали Дејвис.

Дејвис, исто така, советува родителите да разговараат со своите деца за содржината што ја гледаат и внимателно да набљудуваат да не се појават промени во нивното однесување. Семејствата се охрабруваат да имаат семејни појадоци, ручеци и вечери за време на кои родителите ќе посветат целосно внимание на своите деца, подалеку од мобилните телефони и другите електронски уреди.

„Сè уште немаме доволно докази за да извлечеме дефинитивна причинско-последична врска помеѓу количината на време поминато пред екраните и проблемите со менталното здравје, но јасно е дека некои од содржините што ги гледаат младите на интернет, коишто се про-анорексија, самоубиство или самоповредување, може да бидат екстремно штетни“, истакнува д-р Бернадка Дубичка.


Споделете со пријателите!