Макаронс освен тоа што се многу вкусни, познати се и по тоа дека се комплицирани за правење. Точно е дека може да не излезат мазни и подигнати, ама тоа не е причина да не пробате да ги направите. Како и да ги направите, секако ќе бидат вкусни, така што задолжително обидете се.
- 115 гр. мелени бадеми*
- 230 гр. шеќер во прав
- 2 лажици какао во прав
- 144 гр. белки (од 3 или 4 јајца)
- 70 гр. шеќер
- 1 кесичка ванилин шеќер
- малку сол
Фил:
- 250 гр. маскарпоне
- 2 лажици мед
* Најчесто за макаронси се користат лупени бадеми, но за овој рецепт се употребени нелупени, и тоа воопшто не влијае на вкусот или на текстурата на колачите.
Најпрво, просејте ги мелените бадеми, а доколку е потребно тоа направете го и со шеќерот во прав и какаото. Потоа измешајте ги убаво.
Во длабок сад ставете ги белките, шеќерот, ванилата и солта и почнете да ги матите со миксер, со кратки паузи на секои 3 минути матење. Најпрво матете 3 минути на средна брзина, па 3 минути на малку поголема и уште 3 минути на најголема брзина. Со ваквата динамика на матење, белките ќе бидат цврсто изматени и ќе изгледаат суво.
Додајте ја мешавината со бадеми и почнете да мешате со гумена шпатула. Би требало сé да се измеша убаво со околу 40 движења, од долу, со префрлање, како да превиткувате алишта. Доколку забележите дека смесата е цврста и со врвови, треба уште да мешате. Ако земете малку од смесата со лажица и ја истурите назад, кога е добро измешана, истурениот дел прво стои, ама по неколку секунди полека се слева со останатиот дел. Доколку е потечна од тоа, смесата е премногу измешана и ќе биде тешко да се направат кругчиња.
Наполнете ја слаткарската вреќичка со смесата за колачите и направете кругчиња на подлогата или врз хартија за печење. Печете ги макаронсите во рерна загреана на 150°C околу 16-18 минути. Доколку лесно да се одвојуваат, тогаш знаете дека се испечени. Оставете ги да се оладат, па испечете ја втората тура. Од оваа смеса, излегуваат околу педесет макаронси.
Во меѓувреме направете го филот. Филот може да биде различен, комплициран слаткарски крем, стопено чоколадо или џем. Во овој рецепт, филот е едноставен, направен од маскарпоне и мед. Кога колачите ќе се оладат, спојте ги со малку фил во средината. Може да се јадат веднаш, а добри се и следниот ден кога малку ќе омекнат. Чувајте ги во фрижидер.
* рецептите со во целост преземени од ситно сецкано
