Најсоодветниот период од денот за правење на тест за бременост е наутро со примерок од првата утринска урина. Тоа е така бидејќи во првата урина концентрацијата на HCG е најголема
Тестовите за бременост не се користат само за да се утврди бременоста, туку овозможуваат и да се констатираат абнормалните состојби, т.е. нарушувања што предизвикуваат зголемување на нивото на HCG во урината. Исто така, со помош на квантитативните тестови за HCG, може да се следи бременоста во текот на првите 2 месеци.
Хормонот HCG – human chorionic gonadotropin – човечки хорионски гонадотропин народски е наречен хормон на бременоста, бидејќи се произведува во плацентата кај трудниците. Доколку сте бремени, овој хормон кој слободно се движи во вашето тело може да се детектира во урината неколку дена по првиот пропуштен период, во зависност од тоа колку е осетлив тестот. Хормонот HCG е присутен во крвта и урината околу 10-14 дена по зачнувањето. Негативен HCG резултат е нивото помало од 5 мили-интернационални единици на милилитар (mIU/ml), додека пак, позитивен резултат вообичаено е над 20-25 mIU/ml на HCG во урината.
Какви типови на тестови за бременост постојат?
Тестовите за бременост можат да бидат спроведени на два начини:
- Со тестирање на урината;
- Со тестирање на крвта.
Едноставните тестови за урина се достапни во сите аптеки и се многу едноставни за употреба. Примерок од урината се става на тенко стапче кое хемиски реагира по само неколку минути, во зависност од брендот и тестот. Урината може да се нанесе на тестот на неколку начини. Стапчето може да се потопи во чашка со урина до одреден одбележан дел, или пак да се накапат неколку капки од урината со специјална капалка, вклучена во некои тестови. Исто така, на тестовите може директно да се уринира.
Каков и да е тестот и колку и да сте го платиле – функцијата им е иста, да ја утврдат вашата бременост, доколку постои. Дури и најскапиот тест може да покаже невалиден резултат. Поради тоа што секој производител нуди различен начин на читање на резултатот, за да бидете сигурни дека резултатот го читате правилно, најдобро е да се консултирате со упатството за употреба. Некои тестови ја менуваат бојата, други покажуваат знаци како плус или минус, а најчести кај нас се тестовите со цртички и тоа две за позитивен резултат и една за негативен или неважечки резултат. Постојат и дигитални тестови, т.е. тестови со дигитално прозорче, на кое резултатот се покажува со зборови.
Кога станува збор за тестирањето на крвта, постојат два типа на тестови и тоа квантитативен и квалитативен HCG тест. Квантитативниот тест за HCG во крвта се користи за да се утврди количината на овој хормон во крвта, додека пак, квалитативниот едноставно ти кажува дали постои присуство на HCG во крвта. Овие тестови во споредба со тестовите за урина имаат предности, но и недостатоци. Додека тестовите за крв може да ја детектираат раната бременост, се поточни и може да го одредат нивото на хормонот на бременост, сепак се поскапи од тестовите за урина. Исто така, подолг е временскиот период на чекање на резултатот, но недостаток е и фактот што овој тип на тест мора да биде спроведен во лабораторија од страна на медицинско лице, со што повторно се губи време. Тестовите за урина се многу евтини, ги има во секоја аптека и може да се користат во домашни услови, т.е. секаде.
Кога е најдобро да се направи тестот? Колку е точен?
Тест за бременост препорачано е да се прави по пропуштањето на месечниот циклус. Како и да е 10-14 дена од возможното зачнување е најраниот возможен период за да се направи тестот. Сепак, ова не е мерило бидејќи на пазарот постојат поосетливи тестови, кои можат да се прават и порано. Негативниот резултат не секогаш значи дека не сте бремени. Тоа може да биде знак дека е премногу рано за да се детектира HCG или пак, дека тестот е спроведен погрешно.
Најсоодветниот период од денот за правење на тест за бременост е наутро со примерок од првата утринска урина. Тоа е така бидејќи во првата урина концентрацијата на HCG е најголема. Сепак и ова правило не важи за сите тестови, бидејќи постојат тестови коишто може да се прават во секој период од денот и ноќта. Кога се спроведуваат правилно, тестовите за бременост по пат на урина се приближно 97% точни. Доколку добиете негативен резултат, а ги чувствувате симптомите на бременост, пожелно е да направите уште еден тест по една недела или пак, да направите тест по пат на крв кај вашиот лекар.
