Постојат неколку начини на кои што можете сами да си помогнете доколку почувствувате дека имате паничен напад
Паничен напад е ненадејно чувство на прекумерна вознемиреност и страв, проследено со слабост и неможност за контролирање на емоциите. Тој претставува чувство на анксиозност, придружено со препознатливи симптоми. Состојбата на паничен напад е едно од најчестите искуства како последица од подолготраен и континуиран страв, вознемиреност, шок или стрес. Повторливи напади на паника се сметаат за симптом за панично растројство. Оваа дијагноза ја поставува лекар кој што претходно врши бројни физиолошки и психолошки испитувања. Паничниот напад доаѓа ненадејно и без предупредување, но тоа не значи дека не можете да си помогнете. Исто така, не е правило дека се јавува исклучиво кога личноста е под стрес или во паника.
Паничниот напад може да се појави и при извршување на секојдневните обврски, додека возите автомобил, во продавница, додека спиете или за време на деловен состанок.
Препознајте го паничниот напад
За да си помогнете, најпрво треба да го препознаете паничниот напад. Тој претставува збир на психолошки и физиолошки симптоми и може да трае од 5 до 20 минути. Исто така, и знаците не се кај секого исти, но кај сите кулминираат за само неколку минути. Доколку не се реагира навреме, може да доведе до несвестица. Знаци дека добивате паничен напад се: забрзано и засилено чукање на срцето, прекумерно потење, тресење, ладни бранови, топлотни бранови, чувство на губење воздух, мачнина, повраќање, болка во градите, вртоглавици и губење на свест.
Начини на кои може да си помогнете
Доколку ги почувствувате гореспоменатите симптоми, обидете се да останете колку што може посмирени. Оваа техника, колку и да звучи тешко, може да се научи и да се совлада. Најголем проблем претставува дишењето. Тоа е нерамномерно и неправилно. Дишењето не треба да е премногу плитко или пак да се зема премногу воздух, бидејќи така телото може да дојде до состојба на хиповентилација или хипервентилација и привремено губење на свест.
При паничен напад најважно е да се научите правилно да дишете, а тоа е преку дијафрагма.
Доколку сте склони кон добивање на панични напади или пак едноставно сакате да бидете подготвени, редовно вежбајте дишење од дијафрагма. Легнете на кревет, ставете ја едната рака на стомак а другата на гради. Полека вдишете на нос, наполнете го со воздух стомакот и издишете преку уста. Паничниот напад може да се спречи и со задржување на рационалната мисла, односно да бидете свесни и да си речете дека оваа состојба ќе помине за неколку минути, таа е минлива и само производ на стравот. Исто така, корисно е и да научите и неколку техники за релаксација и истегнување на мускулите на телото со цел да се опуштите. Континуираната физичка активност го намалува чувството на вознемиреност. Внимавајте да внесувате храна во повеќе помали порции, за да го одржувате стабилно нивото на шеќер во крвта. Избегнувајте кофеин, алкохол и цигари.
Третман
Доколку оваа состојба продолжи зачестено да се повторува, да речеме еднаш во месецот, треба да се обратите кај лекар. Ќе ви бидат направени испитувања кои што вклучуваат комплетен физички тест, испитување на крв, испитување на тироидната жлезда, работа на срце, како и психолошка проценка и прашања поврзани со животниот стил што го водите.
Доколку доживеете паничен напад, не помислувајте веднаш дека нешто сериозно не е во ред со вас. Паничниот напад со денешната динамика на живеење е доста зачестена појава. Обидете се да најдете свои начини кои што можат да ви помогнат да се ослободите од стресот.
