Завршија прославите, време е да се вратиме во реалноста
Периодот после Нова година е период на исцрпеност од повеќе причини и на повеќе полиња: физичка, ментална и финансиска. Заврши еуфоријата и многумина се чувствуваат тажно, без енергија и немотивирани. На ова чувство дополнително влијае и зимата и ладното време, период кога сме помалку активни и генерално – потажни, најмногу заради недостатокот на сончеви денови и долги ноќи. Но ваквото расположение е нешто што зависи само од вас и можете да го надминете на неколку начини и со практични чекори.
Направете план
Правењето план е секогаш добра идеја. Ова не значи дека треба да започнете да правите распореди и планови за цела година поттикнати со големи и често нереални очекувања, од коишто за брзо ќе се разочарате. Започнете едноставно. Во зависност од вашиот животен стил, испланирајте неколку активности на кои ќе се радувате; на пример кратко патување, излегување со пријатели, одење на романтична вечера, викенд планинарење. Планот е всушност да имате цел на која ќе размислувате а ве опушта и ве радува нејзиното реализирање.
Соочете се со вашата финансиска состојба
После празниците, нормално е да имате потенок новчаник за кој не сакате да размислувате во моментов. Еден совет – соберете храброст и соочете се со реалната состојба, бидејќи игнорирањето само може да ве вовлече во лавиринтот на заеми и кредити. Наместо тоа, однапред испланирајте буџет за наредните месеци додека се средите.
Соочете се со стравот
Излегувањето од сигурната комфор зона најмногу го подигнува адреналинот и носи животна енергија и елан. Ако сакате нешто кое никогаш не сте го имале, ќе мора да направите нешто кое никогаш не сте го направиле. Соочувањето со личните стравови, значи одење напред и растење како личност. Доколку направите нешто ново, нешто нетипично за вас, тоа ќе ве расположи и ќе ви даде мотивација да пробувате нови работи. На пример, научете се да скијате или ако сакате нешто поедноставно, правете ги секојдневните работи на нов и интересен начин.
Бидете активни
Не седете дома. Искористете ги сите убави ладни денови и поминувајте колку што можете повеќе време на отворено. Испланирајте викенд на планина и правете чести секојдневни прошетки. Активноста ве штити од настинки, бидејќи го зајакнува имунитетот и го подига расположението. Најдобра опција е да вежбате. Започнете фитнес програма во која ќе уживате и која нема да ја гледате како обврска, туку како начин на опуштање. Вежбајте без изговори и гледајте како веднаш ви се подобрува расположението.
Хранете се паметно
Сè започнува од храната и расположението многу зависи од она што јадете. Доколку јадете брза храна и не внимавате воопшто на она што го внесувате, ова однесување може да значи (или да води до) депресивно расположение и лично запоставување. Не треба да посветувате премногу внимание на храната, едноставно правете паметни избори.
Внесувајте храна којашто содржи витамин Б, кој ќе му помогне на мозокот да произведува серотонин како производи од полно зрно и јаткасти плодови, како и храна која содржи омега 3 масни киселини како ленено семе, којашто помага да го победите чувството на нерасположеност.
