Начини како навистина да ги исполните новогодишните ветувања и заслужено да се чувствувате подобро
Кога станува збор за новогодишни ветувања, повеќето се однесуваат како политичари со предизборни ветувања. И во двата случаи, заеднички именител е желбата за подобро утре и стремењето кон поквалитетен живот. Традицијата на новогодишни ветувања и посакување нов почеток датира од одамна и претставува дел од многу цивилизации. Како доказ за оваа традиција, кај нас е задржана една изворна форма позната како „Вевчанскиот карневал“, каде што на почетокот на новата година, со страшни маски се брка старата година и сето зло, со желба за нова, подобра и поуспешна година.
Доколку се навратиме на новогодишните ветувања кои служат условно кажано за „лична употреба“, статистиката покажува дека само мал дел од луѓето продолжуваат да ги следат и да ги остваруваат ветувањата што си ги дале самите на себе во текот на целата година. Најчестите ветувања се поврзани со поздрава исхрана, фитнес и намалување или отстранување на лошите навики како пушење и алкохол.
„Сметам дека основните причини зошто овие новогодишни ветувања не успеваат, се состојат во тоа што луѓето си поставуваат нереални цели“, вели психологот Бенџамин Гарднер – Benjamin Gardner, експерт за промени во однесувањето од King’s College London. „Доколку воопшто не сте вежбале и си поставите цел да вежбате пет пати неделно по половина час, тогаш е многу веројатно дека нема да го исполните тоа. Другата причина е бидејќи луѓето едноставно не се подготвени за промена“.
Најважно е новата година да ја започнете со тоа што ќе бидете искрени кон себе. Доколку сте сериозни во вашите планови за самоподобрување, прв чекор е популарните новогодишни одлуки да ги наречете животни одлуки, бидејќи на тој начин тие немаат рок на исполнување околу новогодишните празници, туку во текот на целата година. Исто така, обидете се со мали промени кои што ќе ги воведувате секој ден. Тие може да вклучуваат внесување на овошје во вашата исхрана или откажување од јадење леб или слатки. Истото се однесува и за вежбањето. Доколку воопшто не се занимавате со физичка активност, започнете со пешачење и не го користете лифтот. Овие мали промени незабележително и без напор, ќе станат ваши секојдневни здрави навики.
Започнете ја новата година едноставно со добра намера за поздрав и поисполнет живот. Промените што ги посакувате правете ги со трпеливост, истрајност и секако мотивација.
Важно е да се напомене дека таа мотивација не треба да биде условена од надворешни фактори, туку исклучиво од внатрешни двигатели.
Не правете промени дека морате или пак според желбата на другите. Потрудете се да ја направите промената за себе. Само на тој начин ќе бидете подобри од вчера и на добар и сигурен пат кон успешно остварување на личните цели.
