Дали селфи фотографиите создаваат генерација на егоцентрични и себични деца?
Сите деца и тоа уште од најмала возраст, се опседнати со смартфоните на своите родители. Најмногу прават селфи и гледаат фотографии и видеа, во зависност од возраста. Но во селфи подеднакво уживаат и родителите. Исто така, родителите поминуваат многу време на своите телефони, за работа но и како начин да се помине слободното време. Постојаното фотографирање на своето дете, правење селфи фотографии со него, го прави тоа дете првата (целосно) смартфон генерација. Токму затоа, постојат бројни дебати и анализи за тоа какви последици ќе има овој начин на воспитување понатаму во животот на тие деца.
Вашите деца можеби нема секогаш да го послушаат вашиот совет, но секогаш ќе ве имитираат.
Така, доколку вие сте постојано на смартфон или лаптоп, исто ќе се однесува и вашето дете. Учењето по пат на имитирање е најделотворно и оваа констатација ја употребуваат оние коишто тврдат дека селфи феноменот создава генерација на егоцентрици, како и зависност од користење на мобилни уреди и интернет, која пак ја поврзуваат со ментални проблеми.
Застапниците на позитивниот став кон оваа проблематика пак, тврдат дека селфи е само дел од социјалната комуникација и ја истакнуваат потенцијална корист за подобра комуникација и градење на самодоверба кај децата. Исто така, тие истакнуваат дека правењето селфи фотографии им помага на семејствата и ги прави поблиски, бидејќи им помага да го зачуваат моментот во кој уживаат заедно.
Но нештата никогаш не се црнобели, особено кога станува збор за однесување и воспитување.
Нормално е телефонот да му е интересен и забавен на детето исто како што е нормална фасцинацијата со својот физички одраз за време на детството, велат психолозите. Исто така, постојаното и повторувачко гледање на истото видео на смартфонот, помага при преместување од краткокрајна во долготрајна меморија во детскиот мозок. Родителот треба да биде свесен и запознаен со овие аспекти од психичкиот развој на детето. Строга забрана на користење на смартфони секако дека не е решение, бидејќи тоа дете треба да се интегрира и да се вклопи во околината. Но како и сè друго, доколку постојано се користи или се практикува, секако дека може да има негативни последици.
„Инстант задоволството коешто смартфоните им го овозможуваат на денешните деца, ќе биде тешко да се надмине, истакнува Дебора Бест – Deborah Best, професорка по когнитивна развојна психологија. „Тие ги сакаат нештата веднаш, и сакаат кратко и брзо. Ова ќе има последица врз детската навика да чекаат за да бидат задоволни“, вели таа.
Главната улога ја имаат родителите, а да се биде родител во ова дигитално време не е воопшто едноставно. При воспитувањето, родителот задолжително треба да обрне внимание на употребата и користењето на смартфоните како и интернет културата воопшто, бидејќи таа е нераскинлив дел од нашите животи.
На децата треба да им се објасни дека тоа што гледаат, да речеме, нечија селфи фотографија, дека таа е само еден аспект од таа индивидуа. Децата треба да знаат дека селфи фотографиите не се израз на личноста со цел да избегнат погрешно толкување за да не дојде до погрешно поистоветување и градење нереална слика за себе. Како што се раскажуваат приказни, на истиот начин треба да им се објасни на децата за природата на фотографиите.
Постојат бројни начини како да ги заштитите децата од прекумерното користење на смартфоните и интернетот воопшто. Во зависност од возраста поставете временски граници, контролирајте какви содржини следат и постојано учете ги на трајните вредности како искажување благодарност и градење на работна етика.
