Точно 42.337 од 1.000.000 интернет страници што биле најпосетувани во 2010 година имале еротска содржина, а тоа е околу 4% од сите интернет страници
Интернетот може да биде навистина корисен извор за едукација и забава на децата. Децата на преучилишна и училишна возраст може да го користат интернетот како простор за интерактивни и друштвени игри, алатка за пребарување и истражување кога станува збор за училишни проекти, како и како средство за комуникација со наставниците и соучениците.Но интернет просторот истовремено има и многу негативни страни што може да создадат можни опасности кај децата доколку не го користат правилно и безбедно. Есенцијално е да се биде во чекор со активностите што ги прави детето додека пребарува на интернет, односно да се следи што гледа и слуша, со кого комуницира и што споделува.
5 Најчести интернет опасности за децата
Порнографија
Едно истражување докажува дека 42.337 од 1.000.000 интернет страници што биле најпосетувани во 2010 година имале еротска содржина, а тоа е околу 4% од сите интернет страници. Други две истражувања спроведени во 2006-та и 2007-ма година, докажуваат дека 79% од изложеноста на младите на интернет порнографија се случувала во домашни услови, како и дека 83% од момчињата и 57% од девојчињата на возраст под 18 години имаат следено или гледано групен секс на интернет.
Sexting – Небезбеден „безбеден секс“
Sexting претставува испраќање или добивање на разголени слики или видеа со еротска содржина на мобилниот телефон преку апликации. Овие слики или видеа најчесто се препраќаат од еден на друг и кружат помеѓу младите момчиња и девојчиња. Околу 20% од тинејџерите што праќаат разголени слики од себе на некој друг, а околу 76% од девојчињата и 57% од момчињата што праќаат вакви пораки или видеа го прават тоа со целта да му се допаднат на некој.
Интернет-силеџиство
Силеџиството може да се случи како во реалниот така и во дигиталниот свет. Вообичаено во дигиталниот свет силеџиството е сконцентрирано на разменување на погрдни зборови и закани, како и невистини што се шират многу брзо во опкружувањето на децата на училишна возраст. Околу 24% од децата на училишна возраст и тинејџерите се соочиле со ширење невистини за себе од страна своите врсници на интернет, како и 9% добиле закана преку електронска комуникација дека ќе се сподели невистина за нив.
Интернет-предатори
Интернет просторот е одличен за запознавање нови личности и проширување на пријателските кругови, но често е простор на кој интернет-предаторите ги наоѓаат своите жртви. Нивната мета се токму помалите деца што бараат другар за комуникација. Предаторите се експерти за манипулација со децата и за остварување на интернет-врска со деца на училишна возраст. Овие ситуации во кои детето може да развие пријателска или романтична врска со непозната личност во краен случај може да заврши со киднапирање или злоупотреба. Околу 76% од интернет предаторите се на возраст од 26 години или постари, а околу 83% од жртвите коишто оствариле средба со предаторот/злоупотребувачот се согласиле да отидат негде со него.
Социјални мрежи и Youtube
Социјалните мрежи, особено Facebook и Twitter, се многу популарни помеѓу децата и тинејџерите. Иако имаат позитивни страни, може да влијаат многу негативно на социјалниот, општествениот и културниот развој на децата. Иако Facebook има старосна граница од 13 години за креирање на профил, околу половина од родителите на деца на 12-годишна возраст велат дека нивното дете има профил, а околу ¾ од нив велат дека му помогнале на своето дете во креирањето на профилот. Youtube пак, е најпопуларната интернет страница за споделување на видеа на која многу често не се почитуваат правилата за дозволени и недозволени содржини. Со оглед на тоа што за 48 часа онлајн се прикачуваат повеќе од 3 милијарди видео записи на Youtube, ризикот децата да наидат на невкусни, еротски или провокативни содржини е огромен.
Совети како да го заштитите своето дете
- запознајте го со потенцијалните опасности при пребарување на интернет и подучете го кои содржини и ситуации се несоодветни и небезбедни за да ги избегнува;
- подучете го како безбедно и внимателно да пребарува и да не споделува лични податоци (име, презиме, адреса на живеење) на јавни страници;
- потенцирајте му доколку се најде во ситуација да стапи во контакт со непозната личност веднаш да ви каже, да не разговара со неа и во ниеден случај да не прифаќа средба;
- поставете го компјутерот на видливо централно катче во домот, наместо во детската соба, што ќе ви овозможи да имате подобар надзор на активности на вашето дете;
- секогаш имајте на знаење кои интернет страници ги посетува и кои игри ги игра вашето дете;
- пожелно е да не го оставате вашето дете да „сурфа“ самостојно на интернет и повремено да ја проверувате историјата на компјутерот (практикувајте ја опцијата „Safe Search“ на „Google“ за филтрирање на пребарувањата);
- ставете лозинка на компјутерот за вашето дете да не може да пребарува на интернет без ваша дозвола;
- кога е помало не му дозволувајте да ги користи социјалните мрежи;
- кога ќе ги користи социјалните мрежи редовно проверувајте го неговиот профил, пораки и пријатели.
