Родителите се под постојан стрес а воедно ги запоставуваат своите деца бидејќи се постојано на своите телефони
Користењето на смартфоните и таблетите се начин да се замине од работа во предвиденото време и да се биде дома за ручек, но сите овие мобилни уреди го одземаат вниманието и се извор на стрес, открива едно истражување. Статистиката говори дека, во просек, луѓето минуваат осум часа неделно одговарајќи на мејлови надвор од работното време, што е еквивалент на дополнителен работен ден. Воедно, проверувајќи електронска пошта навечер резултира со емотивна исцрпеност.
Истражувачите замолиле група на родители да одговорат на детално изработени прашалници во врска со тоа како и кога користат мобилна технологија. Групата на истражувачи предводени од д-р Џени Радески – Jenny Radesky, во својот труд истакнува дека смартфоните и таблетите ја замаглуваат линијата помеѓу работата, домот и социјалниот живот а родителите се борат да балансираат помеѓу овие аспекти.
Воспоставувањето на рамнотежа помеѓу секојдневните обврски и слободно време, може да предизвика внатрешна тензија, конфликти и негативна интеракција со своите деца.
Од друга страна, родителите испитаници ги посочуваат позитивните аспекти од мобилните уреди, бидејќи тие им овозможуваат да поминуваат повеќе време дома заедно со своите деца. Но во истовреме, чувствуваат притисок да бидат постојано достапни дури и кога играат со своите деца, односно надвор од своето работно време, плашејќи се да не бидат перцепирани како лоши работници.
„Тоа е заради стравот да се биде нерелавантен во својата професионална кариера“, рекол еден родител во анкетата.
Целиот проблем во користењето на мобилните уреди дома е дека родителите не можат да се фокусираат ни на работата ни на децата кога сакаат да ги прават и двете работи во исто време, вели проф. Лери Росен – Larry Rosen. Особено помладите родители се обидуваат да работат мултитаскинг но тоа е практично невозможно и создава дополнителен стрес. Мобилните уреди не само што создаваат дополнителен стрес за родителите, туку ве прават и лоши родители.
Бидејќи родителите поминуваат многу време на своите телефони, им посветуваат помалку внимание на своите деца, што резултира со непосакувано однесување од страна на децата коишто сакаат да привлечат внимание по секоја цена.
Д-р Џени Радески, која е педијатар со специјализација за детски развој, за време на нејзиниот работен ангажман во медицинскиот центар во Бостон спровела уште едно истражување, ненаучен вид на студија, која таа ја опишува како антрополошка опсервација со детални извештаи. Тие извештаи истакнуваат дека за време на ручек во ресторан за брза храна, 40 од 55 родители скоро постојано го користеле својот телефон за време на оброкот и биле целосно ангажирани од содржината, но за сметка на тоа ги запоставувале децата коишто сакале да им го привлечат вниманието.
Еден од начините да се интервенира врз овој проблем е да се испланира дел од денот, за време на ручекот или непосредно по доаѓањето од работа дома, да не се користат мобилни уреди.
