Крушите се здрави, екстремно вкусни, а изгледа и дека ни помагаат да не ја зголемиме телесната тежина
На повидок имаме нов напредок кога станува збор за придобивките од здравата храна. Овој пат истражувачите се фокусирале на крушата како овошје кое дава многу добри резултати ако во предвид го земеме нашето здравје. Според нив, крушата има полезно дејство врз нашето здравје. Богата е со витамин Ц и растителни влакна, го намалува ризикот од мозочен удар, ни помага со мамурлакот, а според ова ново истражување крушата има позитивен ефект врз регулирањето на телесната тежина. Односно, доколку крушата ја ставиме на нашето дневно мени, таа ќе ни помогне во намалување на ризикот од прекумерна тежина.
Според истражувачите, луѓето кои јадат круши имаат помала телесна тежина и имаат за околу 35% помала можност прекумерно да се здебелат, за разлика од луѓето кои не јадат круши. Исто така, тие забележале дека јадењето на круши влијае позитивно на квалитетот на целокупната исхрана и внесувањето на хранливи материи.
Користејќи податоци собирани во текот на 9 години врз основа на околу 24 000 испитаници, научниците заклучиле дека луѓето кои јаделе круши, за разлика од тие кои не јаделе, освен што имале помала телесна тежина, тие консумирале помало количество на алкохол, пушеле помалку цигари, нивната исхрана била побогата со растителни влакна и витамини, а посиромашна со маснотии и шеќер. И на двете групи (и на тие што јаделе круши и на тие што не јаделе) им било давано исто количество на калории. Поздравата исхрана на луѓето кои јаделе круши се засновала на јадењето на повеќе овошје и протеини од морска храна, а намален внес на натриум и калории. Истражувачите веруваат дека помалата телесна тежина се должи на растителните влакна. Влакната се прилично важни во дневната исхрана бидејќи помагаат во варењето на храната и н прават да се чувствуваме „полни“, односно најадени. Ова ни ја намалува желбата за храна и со тоа нашата телесна тежина се регулира. Растителните влакна исто така го намалуваат ризикот од појава на срцеви заболувања, дијабетес тип 2 и рак, а освен во крушите ги има и во леќата, малините, артичоката, итн. Препорачливо за добро здравје би било да се комбинираат повеќе извори на растителни влакна во исхраната.
Научниците истражија дека секојдневното јадење на свежи круши е од огромно значење за здрав начин на живот и регулирана тежина. Тие треба да бидат дел од секојдневната исхрана. Пребогати се со хранливи материи, сочни се и премногу вкусни за да се двоумиме. Тркнете до најблискиот пазар и уште денес купете си круши за подобро здравје во овие студени денови.
