Хроно исхрана – да или не?

Што е хроно диета и дали е безбедна како начин на исхрана 

Ако досега не сте чуле за хроно исхрана, тоа значи дека воопшто не сте во тек со најновите трендови во исхраната. Постојано расте бројот на луѓе коишто ја применуваат оваа исхрана најмногу заради брзите резултати, односно посакувано слабеење. Хроно диетата стана светски популарна најмногу заради нејзиното основно правило – јадеш колку сакаш. Нема броење на калории и нема изгладнување. Ваквиот начин на исхрана потврдува дека не е важно само што јадеш, туку и кога јадеш.

Овој принцип на јадење во одреден временски период е многу стар и потекнува од Ајурведата, антички систем на традиционална медицина што потекнува од Индија, кој ја истакнува важноста од јадење (и живеење) според природните дневни циклуси за одржување на здравјето. Слично на ова, во традиционалната кинеска медицина се верува дека секој орган поседува свој ритам на работа и затоа одредените терапии треба да се применуваат во одредено време од денот. Цела источна мисла за функционирање според биоритамот, во Западниот свет се преведува со светски популарната – хроно диета.

Другите правила на хроно исхраната вклучуваат дека треба да се јаде на секои 4-5 часа, појадокот треба да биде обилен а ручекот и вечерата се на база на протеини. На самиот почеток, има рестриктивен период со минимално време од 28 дена, со цел телото да се прилагоди на новиот начин на исхрана.

Што е забрането во хроно исхраната

• Без течности 30 минути пред и по оброк. Воедно, забранети се секакви видови на сокови и засладени напитоци а минерална вода може да се пие само 2 чаши дневно;
• Внес на секако вид на шеќер, мед и вештачки засладувачи. Од природните засладувачи, може да се користи само стевиа;
• Сите видови на млеко, со исклучок на домашно бадемово млеко;
• Овошје не смее да се јаде во рестрикција;
• Забранет е маргаринот а може да се јаде путер и маст;
• Треба да се користи лимон како замена за оцет, кој е забранет, дури и домашниот;
• За време на рестрикција, забранет е мешункаст зеленчук (грашок, пченка, компири, грав, ориз);
• Соја и соини производи;
• Алкохол, со исклучок црно вино;
• Овошни чаеви;
• Јогурт (и кефир во рестриктивниот период).

Позитивни страни

Многу научни истражувања одат во прилог на овој начин на исхрана. Едно истражување, потврдило дека испитаниците коишто јаделе повеќе наутро а помалку навечер, изгубиле повеќе килограми од оние коишто внесувале иста храна, но јаделе повеќе навечер. Слично истражување покажало дека со обилен појадок и малку калории навечер, го подобруваат метаболизмот и поттикнуваат слабеење. Важноста од биоритамот најмногу се гледа кај оние коишто работат трета смена, поточно во нарушување на нивното здравје. Овие група на лица имаат зголемен ризик од висок крвен притисок, висок холестерол, зголемени триглицериди, срцев удар итн.

Научниците истакнуваат дека биоритамот е фасцинантно поле за истражување бидејќи ја потврдува „мудроста“ на телото (функционирањето на организмот) и ни помага да го одржиме или обновиме здравјето.

Други факти коишто исто така се во прилог на хроно исхраната е внесот на групите на храна. Иако најмногу се заснова на протеини, хроно диетата не ги исклучува јаглехидратите. Имено, доколку нагло го намалите внесот на јаглехидрати, може да се соочите со општа слабост, главоболки, проблеми со дигестија и слично.

Типичното хроно мени се основа на jагленихидрати, протеини и масти за појадок, протеини и зеленчук за ручек и вечера.

Негативни страни

Друга карактеристика на хроно исхраната е постоењето на строги правила и период на рестрикција. Токму овие правила не му одат во прилог на овој режим на исхрана. Не само што е заморно и напорно цело време да се следат строгите хроно правила, целосното исклучување на овошје и мешункасти плодови, јогурт и кефир ја прават хроно исхраната диета, а не начин на исхрана кон кој ќе можете да се придржувате цел живот за одржување на целокупното здравје. А дефиниција за диета е начин на исхрана кој се применува одреден период за одредена цел, најчесто слабеење.

Друга негативна одлика на хроно исхраната, повеќето ја препишуваат на големата количина на месо како главен извор на протеин. Иако поборниците на оваа исхрана се бранат дека тоа месо треба да е домашно и сушено (а не преработено), сепак не е најздрава опција. Протеините треба да доаѓаат и од растителни извори, бидејќи преку месото се внесуваат и повеќе заситени масти, со чија консумација се зголемува количината на холестеролот во крвта.

Внесот на поголеми количини на масти од животинско потекло можат да доведат и до многу други заболувања како остеопороза, артритис, висок крвен притисок, вклучувајќи ги и малигните заболувања.

Исто така и неограниченоста на внесување на протеини, може да претставува проблем, бидејќи постои одредена препорачана количина на дневен внес на протеини кој се пресметува според тежината (0,8 г протеин на еден килограм телесна тежина), возраста, нивото на активност, мускулна маса, физички цели (доколку сакате да зголемите мускулна маса или да ослабете) и моменталната здравствена состојба. Тајната на оваа диета е дека ве слабее заради зголемениот внес на протеини. Ова е тајната на сите диети во спектарот на ниско-јаглехидратна исхрана, која првенствено се користи за губење на прекумерна тежина.

Научна страна

Научниците ги споредија сите диети, коишто многумина ги сметаат за делотворни, започнувајќи од ниско јаглехидратна, нискомастна, високо протеинска (хроно диета), медитеранска, веганска итн., со цел да одредат која диета е најдобра. Тие заклучија дека ниедна од нив не е најдобра, но сите тие имаат заеднички елементи коишто имаат здравствени придобивки. Кога овие придобивки би се дефинирале во најдобар начин на исхрана тој би бил:

„исхрана базирана на минимално процесирана, природна (најмногу растителна) храна, која е најделотворна за одржување од здравјето и превенција од болести“, заклучуваат научниците.