Јапонски истражувачи генетски модифицираа кокошки чии јајца содржат лекови кои можат да се борат против ракот
Во обид драматично да ги намалат трошоците за лекување, Јапонски истражувачи генетски модифицираа кокошки чии јајца содржат лекови кои можат да се борат против сериозни болести, вклучувајќи го и ракот на кожа.
Истражувачите од Националниот институт за напредна индустриска наука и технологија „AIST“ успешно генетски модифицираа кокошки за да положуваат јајца што содржат фармацевтски лек.
Според извештајот во „The Japan News“, истражувачите од „AIST“ генетски модифицирале перкурсорни клетки во сперматозоидите на петлите со цел да произведат еден вид на протеин, наречен интерферон бета, кој е поврзан со имунолошкиот систем и кој е моќна алатка за лекување на рак на кожата и хепатитис. Модифицираните клетки потоа биле искористени за оплодување на јајцата и за добивање на генетски модифицирани кокошки што ќе ги наследат гените со протеинот интерферон бета.
Компанијата за увоз и продажба на реагенси „Cosmo Bio Co.“ во Токио, која го развила методот заедно со истражувачите на „AIST“ и Националната организација за истражување на земјоделството и храната во префектурата Ибараки, сега има три кокошки кои лежат јајца чии белки го содржат протеинот интерферон бета. Научниците понатаму планираат да го продадат лекот на фармацевтски компании со што би ја преполовиле неговата цена.
„Целта на проектот беше да се намалат трошоците за правење на лекови. Ова е резултат на кој се надеваме дека ќе доведе до развој на евтини лекови“, рече Хиронобу Хоџо, професор на универзитетот Осака.
Во иднина ќе биде неопходно внимателно да се испитаат карактеристиките на лековите содржани во јајцата и да се одреди нивната безбедност како фармацевтски производи. Ова е само еден пример за тоа како методите за уредување на ген можат да преструктуираат цели индустрии. Производството на евтини лекови од јајца од кокошка е уште една креативна можност, се вели во извештајот.
Понатаму истражувачите планираат да работат на стабилизирање на содржината на интерферонот бета на јајцата за да произведат од 10 до 100 милиграми во едно јајце.
