Мајчиното млеко е неопходно за бебето и тоа треба да биде нахрането секогаш кога е гладно. Тогаш зошто доењето на јавни места за некого е неприфатливо?
Доењето е најважно за здравјето на новороденчето, бидејќи мајчиното млеко е незаменлива храна за доенчето. Чинот на доење пак, претставува најдобар начин за правилен физички и емотивен развој на бебето. Социолозите и педијатрите се едногласни дека доењето е природен чин кој не смее никаде да се забранува.
Застапеното мислење дека доењето во јавност е недолично однесување, социолозите го препишуваат на објективизацијата и сексуализацијата на женското тело.
Педијатрите истакнуваат, дека во периодот на интензивна лактација, настануваат бројни неудобности проследени со болка во градите, па затоа доењето не само што е пожелно, тоа е неопходно за здравјето на мајката и на бебето. Заеднички е и ставот дека е потребна поголема поддршка од страна на општеството за доење на јавно место, но и за доење на работно место. Токму тоа е главната задача на Светската недела на доењето, што се одбележува секоја година од 1 до 7 август, со главна цел – промовирање и охрабрување на чинот на доење, важен за здрави новороденчиња.
Доење на јавно место најчесто значи доење пред други луѓе, доење во трговски центар, кафуле или парк. На почетокот, додека се адаптирате, секако дека ќе доите како што ви е вам најудобно, додека подоцна, кога веќе се навикнувате на овој чин, треба да доите секогаш кога вашето бебе е гладно, а тоа подразбира на секое место. Неколкуте совети за полесно снаоѓање на доење на јавно место вклучуваат:
Претходно планирање
Излегувањето надвор со новороденче, подразбира правење план и подготовка. Тоа се однесува и на доењето. Претходно одредете колку време ќе бидете надвор од домот и колку пати би требало да доите.
Удобна облека
Облечете се удобно и понесете лесна марама доколку сакате да се покриете. Исто така, достапни се и специјализирани марами за доење кои што можат лесно да се набават и кај нас.
Најважно од сè, секогаш знајте ги вашите права
Според Законот за рамноправност на Велика Британија, Equality Act 2010 никој не смее да ѝ забрани на доилка да дои на јавно место и спречувањето доење на јавно место се третира како криминален акт на полова дискриминација.
Во Македонија нема посебен закон за родова еднаквост кој ја заштитува мајката за доење на јавно место. Единствено место во Законот каде што се спомнуваат доилки, е Законот за работни односи, член 171 кој гласи: „Работничката која го дои детето и по изминувањето на отсуството поради бременост, раѓање и родителство, ќе започне да работи со полно работно време, има право на платена пауза во текот на работното време, во траење од еден и пол час дневно, во кое време се засметува и дневната пауза. Тоа право го има работничката до наполнета една година возраст на детето.“
Иницијатива за заштита на мајките кои дојат во јавност
Неодамна, една мајка од Шведска, започна фејсбук кампања за построги закони за заштита на мајките кои дојат во јавност. Таа забележала тенденција на зголемена нетолерантност во нејзината земја по ова прашање, откако ја прекориле дека е недолично да дои во библиотека. Статистиката од организацијата „Спаси ги децата“, ја рангира Шведска како една од земјите со најдобри услови поврзани со доење и закон за доилки. На истата таа листа, високорангирана е и Словенија, додека Македонија ја нема. Високото рангирање на наша соседна земја е индикатор кој не дозволува да се остави простор за изговори дека Шведска е високо развиена земја а Македонија не е, па затоа не се обрнува внимание на заштита на мајките кои дојат на јавно место. Останува да се заклучи дека е потребен активен ангажман од сите страни, како на колективен, така и на индивидуален план, за подигнување на свеста за ова прашање.
* Фотографиите се авторско дело на Ивет Ајвенс како дел од
фото-проектот, „Breastfeeding Goddesses“
