Скопје Сити Мол и ЈЗУ Институтот за белодробни заболувања и туберкулоза, ќе организираат бесплатни тестови за граѓаните
Денес, по повод Светскиот ден против пушењето, Скопје Сити Мол во соработка со ЈЗУ Институтот за белодробни заболувања и туберкулоза, од 11 до 14 часот, во Скопје Сити Мол ќе организира бесплатни тестови за испитување на белодробната функција на сите заинтересирани граѓани. Исто така, ќе биде спроведена и акцијата „Остави ги цигарите, земи книга и едуцирај се за здравјето“, со која сите што ќе ги фрлат своите кутии со цигари ќе добијат книга од „Просветно Дело“ за здравјето.
Секоја година на 31 мај, се одбележува Светскиот ден против употреба на тутун. Годинава, овој ден е посветен на потребата од стандардизација на пакувањето на цигарите и донесување соодветна законска регулатива, а мотото е “Подгответе се за унифицирано пакување”.
Целта на мотото за користење на унифицирано пакување е да се спречи употребата на логоа, бренд фотографии или промотивни информации на пакувањата на цигари, и тие да бидат со ист стандарден фонт и боја.
Според СЗО, оваа мерка е со цел да се намали атрактивноста на овие производи, пакувањата на цигарите да не служат за рекламирање и промоција и да се зголеми ефективноста на предупредувањата за здравјето. Австралија е првата земја која што го имплементираше унифицирано пакување во декември 2012 година, додека уште неколку други држави се подготвуваат на овој чекор. Унифицираното пакување се надоврзува на други мерки како дел од еден сеопфатен мултисекторски пристап кон воспоставувањето контрола на тутунот. Спроведените истражувања по воведувањето на сликовити предупредувања на пакувањата на цигарите во Бразил, Канада, Сингапур и Тајланд доследно покажуваат дека сликовитите предупредувања значително ја зголемуваат свеста на луѓето за штетните последици од пушењето. Во Македонија, од 2010 година, започна владина кампања во за штетноста од цигарите.
Клучни факти за тутунот:
- Тутунот убива до една половина од своите корисници;
- Тутунот убива околу 6 милиони луѓе секоја година. Повеќе од 5 милиони од овие смртни случаи се последица на директната употреба на тутун од страна на починатите, додека во повеќе од 600,000 случаи станува збор за непушачи кои биле изложени на чад од цигари и починале како резултат на пасивно пушење;
- Речиси 80% од вкупниот број пушачи во светот, кој се проценува на една милијарда, живеат во земји со низок и среден доход.
