„Здравите“ деца можат да носат исто толку КОВИД-19 како и заболени возрaсни лица
Летото на северната хемисфера е при крај и ако не сме многу претпазливи за повторно отворање на училишта и градинките, децата наскоро би можеле да играат многу поголема улога во пандемијата со КОВИД 19, предупредуваат научниците, бидејќи како што велат тие, со самото тоа што децата често не покажуваат симптоми, не значи и дека не носат никакви траги од вирусот.
Додека децата би можеле да заболат од КОВИД-19 со пониски стапки од колку кај возрасните и да покажат поблаги или никакви симптоми, откако ќе се заразат со вирусот, научниците велат дека може да носат невообичаено висок процент на истиот. Ова значи дека дури и без очигледни симптоми, децата со КОВИД-19 се потенцијално заразни, носат голем број на вирусни честички од училиште до дома и повторно се враќаат назад.
„За време на оваа пандемија КОВИД-19, ние опсервиравме главно симптоматски субјекти, па затоа дојдовме до погрешен заклучок дека огромното мнозинство на заразени лица се возрасни“, вели детскиот гастроентеролог Алесио Фасано, кој работи во MassGeneral Hospital – болница за деца во Бостон, напоменувајќи дека резултатите покажуваат дека децата не се заштитени од овој вирус и дека треба да гледаме на нив како потенцијални преносители на КОВИД 19.
Една студија, спроведена во две болници во Бостон за време на пикот на епидемијата, е досега најсеопфатната анализа направена врз пациенти деца заболени со КОВИД-19. Кај опсервираните 192 деца и млади на возраст од 0 до 22 години, истражувачите откриле дека 49 деца кои го носеле САРС-КоВ-2 (коронавирусот што предизвикува КОВИД-19) и 18 деца кои имале мултисистемски воспалителен синдром кај деца (МИС-Ц ) – болест поврзана со КОВИД-19. Во споредба со возрасните хоспитализирани за КОВИД-19, овие деца имале изненадувачки поголемо ниво на коронавирус во дишните патишта, особено во првите два дена од заразувањето со него.
Пулмологот од Општата болница во Масачусетс Лаел Јонкер, вели дека не очекувал дека вирусното оптоварување кај децата ќе биде толку големо.
„Кога го читате ова мислите на болница и на сите мерки на претпазливост што се преземаат за лекување на сериозно болни возрасни лица, но вирусните оптоварувања на овие хоспитализирани пациенти се значително помали отколку кај ‘здравото дете’ кое шета со високовирусен SARS-CoV-2“, вели Јонкер.
Ова за сите вклучени во истражувањето било вознемирувачки резултат, бидејќи имањето поголемо вирусно оптоварување потенцијално може да значи повеќе ширење на вирусот и, според тоа, поголем ризик од зараза. Се чини дури и кога децата покажуваат благи или се без симптоми, тие, всушност, носат високи дози на вирусот, доволни за доведат до хоспитализација на возрасна личност.
„Педијатриските пациенти не покажаа очигледна разлика во вирусното оптоварување во споредба со возрасните кои имаат потреба од интубација за тешка инфекција со САРС-КоВ-2 кога се стратифицираат според времето. Вирусното оптоварување кај деца во фаза на рана инфекција било значително поголемо отколку кај хоспитализирани возрасни со тешка болест со над 7 дена симптоми“, пишува тимот во студијата.
Авторите на истражувањето велат дека ова може да ги направи стратегиите за контрола на инфекциите многу потешки за спроведување, особено затоа што лесните симптоми на КОВИД-19 се појавуваат толку слични со на другите вообичаени болести и напоменуваат дека идентификувањето на САРС-КоВ-2 инфекцијата кај децата ќе стане уште попредизвикувачко за време на сезоната на алергија на полен и сезоната на грип оваа есен.
Додека треската е обично првиот симптом на КОВИД-19 вирусот, студијата покажала дека само половина од децата со акутни САРС-КоВ-2 инфекции биле манифестирани со висока телесна температура. Ова сугерира дека скринингот на температурата можеби и не е ефикасна алатка за повторно отворање училишта и градинките, при што се предлага фокусирање на стратегии како социјално дистанцирање, употреба на маски, вирусен скрининг и/или далечинско учење.
„Без мерки за контрола на инфекцијата, како што се овие“, заклучуваат авторите, постои значителен ризик дека пандемијата ќе опстане, а децата би можеле да го носат вирусот во домот, изложувајќи ги возрасните кои имаат поголем ризик од развој на тешка болест“. Тие напоменуваат дека во семејства со пониски примања, каде повеќе генерации често живеат под ист покрив, ова може да биде смртоносно.
Се уште е нејасно како оваа инфекција се шири низ домот или училиштата, но неодамнешните истражувања покажуваат дека тоа може да има врска со возраста на детето. Децата под 10 години, на пример, се чини дека не го шират вирусот до нивните постари соученици.
„Оваа студија обезбедува многу потребни факти за креаторите на политиките за да донесат најдобри можни одлуки за училиштата, градинките и другите институции. Децата се можен извор на ширење на овој вирус и ова треба да се земе предвид во фазите на планирање за повторно отворање на училиштата, вели Алесио Фасано, професор по педијатрија на Медицинскиот факултет на Харвард.
