Спортувањето носи многу придобивки кај децата, почнувајќи од физичкото и психолошкото здравје, сè до социјалниот аспект од животот
Исто како правилната и здрава исхрана, физичката активност е подеднакво важна за развојот и здравјето на децата. Практикувањето на било кој спорт или физичка активност е есенцијално за нивното подобро и правилно растење и развивање. Здравствените придобивки од спортовите, како кај возрасните, така и кај децата се огромни и, оттука, голема предност е да се започне со физичка активност уште на рана училишна возраст.
Здравствени придобивки од спортување кај децата
- здрави и цврсти мускули и коски;
- помала веројатност за прекумерна тежина и искривување на ‘рбетот;
- намалување на ризикот од заболување од дијабетес – тип 2;
- одржување на нормален крвен притисок и холестерол во крвта.
Социјални придобивки од спортување кај децата
- тимски дух;
- почит кон врсниците;
- поголема самодоверба;
- полесна адаптибилност на различни средини;
- подобра концентрација, организација, дисциплинираност.
Препорачливи спортови и физички активности за деца
- кошарка
- фудбал
- пливање
- одбојка
- ракомет
- балет
- тенис
- возење велосипед и ролерки
- лизгање
- трчање
- пешачење и истегнување
Колку спортување е доволно спортување за децата?
Проблемот со неактивноста и постојаното седење е секојдневен проблем кај децата на предучилишна и училишна возраст. Имено, физичката активност и спортувањето се важни токму за тие да растат и да се развиваат правилно за во иднина да немаат проблеми со прекумерна тежина, искривувања на ‘рбетот, како за зголемувањето на флексибилноста на телото и зајакнување на коските и мускулите.
Помогнете му на вашето дете да го одбере вистинскиот спорт
Во зависност од сопствените интереси, карактер и можности, секое дете може да се пронајде во различен спорт или спортска активност. Она што е важно е да му помогнете на вашето дете полесно да го направи тоа, воедно без да го притискате да се насочи кон одреден спорт кој сметате дека би му прилегал. Децата понекогаш пробуваат и по неколку различни спортови, сè додека не го најдат оној вистинскиот што целосно ќе ги исполни со радост и ќе ги мотивира да напредуваат и да се надградуваат секојдневно. Затоа бидете трпеливи и охрабрете го вашето дете да го одбере спортот што со задоволство ќе го практикува и што ќе направи да се чувствува исполнето.
