Како да се препознае асимптоматската бактериурија при бременост и што да се преземе во ваков случај?
Бременоста е специфичен период од животот на жената и сериозен терапевтски предизвик во случај на одредени заболувања со оглед на опасностите по здравјето на идната мајка и плодот. Поради задржување на урината, во текот на бременоста еден од најфрекфентните здравствени проблеми се секако уринарните инфекции. Задржувањето на урина се јавува поради хормонално проширување на мочоводот и лошата подвижност како и притисокот на матката на мочоводот.
Како да ги препознаеме уринарните инфекции при бременоста?
- Нагон за често мокрење, пратено со итност и ноктурија;
- Болка и печење при мокрење;
- Хематурија-неколку капки крв се појавуваат на крајот на мокрењето;
- Болки или грчеви во долниот дел на стомакот веднаш над срамната коска.
Сепак во одредени случаи немаме симптоми а сепак има бактерии во урината. Оваа состојба се нарекува асимптоматската бактериурија при бременоста. Тоа е состојба во која уринската култура открива значителен пораст на патогени, кој е поголем од 100 000 бактерии/мл, но без симптоми на инфекција а се јавува кај дури 15% од бременостите.
Бременоста ја зголемува прогресијата од асимптоматска кон симптоматска бактериурија, што може да доведе до пиелонефритис, ризик од предвремено породување, пукање на плодните обвивки или ниска родилна тежина што резултира со повисоки стапки на смртност кај бебињата. Токму затоа сите бактериурии во бременоста треба да се третираат, а изборот на антимикробна заштита во бременоста треба да ја одразува безбедноста за мајката и за фетусот.
Како да се дијагностицира асимптоматската бактериурија при бременост и што да се преземе во ваков случај?
- Рутински скрининг за асимптоматска бактериурија се препорачува на почетокот на бременоста. Жените со бактериурија, потврдени со втора уринокултура, треба да се третираат и да се повтори тестот за уринокултура при секоја посета на гинеколог до породувањето.
- Се препорачува одмор и добра хидратација на организмот т.е. пиење на 2-3 литри вода дневно за да се „одмијат“ бактериите од уринарниот тракт.
- Мокрење секогаш кога имаме потреба и целосно измокрување со мускулна масажа.
- Користење на препарати со Д-маноза и пробиотици најмалку 7 дена бидејќи ја намалуваат концентрацијата на E. coli кој е најчест причинител на уринарни инфекции. Д-маноза е едноставна молекула на шеќер што се среќава во растенија како што се боровинки, брусници, праски, портокали и јаболка, и кој 30 години се користи за природен препарат за отстранување на E. Coli од уринарниот тракт. Може да се користи подолго време бидејќи Д-манозата е апсолутно безопасна и може да ја користат бремените жени, деца и дијабетичари.
- Антимикробна терапија по препорака на гинеколог. Според клиничката слика, периодот на бременоста и антибиограмот, се препорачуваат следните антибиотици: fosfomicin Ceftibuten, co-amoksicilin, nitrofurantion, amoksicilin.
