Нова студија открива дека некористењето на Фејсбук дури само 5 денови може да го намали нивото на стрес
Ако скандалот со „Cambridge Analytica“ не ве натера да го избришете својот Фејсбук профил, новата студија којашто открива дека напуштањето на популарниот социјален медиум може драстично да ги намали нивоата на стрес.
Скандалот „Cambridge Analytica“, исто така, познат како најголем протек на лични податоци во историјата на Фејсбук, предизвика социјалната мрежа да изгуби околу еден милион дневни корисници од низ целиот свет.
Доколку не спаѓате во групата на на луѓе коишто го избришаа својот Фејсбук-профил и мислата дека вашите лични податоци може да се користат за манипулација со гласачи не е доволна да ве натера да го направите тоа, можеби оваа нова студија ќе влијае на вашата одлука.
Резултатите, коишто беа објавени во дневникот „Journal of Social Psychology“, може да ве убедат да го избришете Фејсбук профилот, ако не во знак на протест, тогаш од загриженост за вашето здравје.
Имено, станува збор за научно истражување спроведено од страна на истражувачи предводени од Ерик Ванман, академски професор на Факултетот за психологија на Универзитетот Квинсленд во Бризбејн, Австралија. Истражувањето било спроведено со цел да истражи влијанието на Фејсбук врз нивото на стрес и целокупната благосостојба на корисниците.
Професорот Ванман и неговите колеги испитувале две групи на активни корисници на Фејсбук, од кои вкупно 138 учесници во студијата. Од едната група било побарано да се воздржат од користење на Фејсбук во период од 5 дена, додека од другата група да продолжат да го користат Фејсбук како вообично.
Истражувачите земале примероци од плунка од учесниците на почетокот и на крајот на истражувањето со цел да ги измерат нивните нивоа на хормонот на стресот – кортизол. Тие потенцираат дека наодите од студијата докажуваат дека некористењето на Фејсбук дури само 5 денови го намалува нивото на хормонот за стрес.
Познато е дека кортизолот се зголемува кога сме под стрес. Всушност, овој хормон се смета дека игра клучна улога во стресот, регулирајќи како нашето тело реагира на него. Оттука, високото ниво на кортизол може да го компромитира нашиот имунолошки систем, правејќи нè поосетливи на заболување од инфекции, нарушување на помнењето и зголемување на телесната тежина. Дополнителни негативни ефекти што може да се појават како резултат на зголемени нивоа на кортизол во текот на подолг временски период се нарушена когнитивност, намалена функција на тироидната жлезда и насобирање на масни наслаги.
Од друга страна пак, истражувачите велат дека додека кај учесниците во нивната студија се покажало подобрување во физиолошкиот стрес, истовремено, апстиненцијата од активности на Фејсбук предизвикала чувства на тага и намалена благосостојба. Имено, учесниците изјавиле дека се чувствуваат незадоволни од својот живот и дека се надеваат на продолжување на нивната активност на Фејсбук.
Проф. Ванман шпекулира за она што може да довело до овие резултати. Тој вели дека испитаниците во и по 5-те денови без Фејсбук се чувствувале помалку задоволни со својот живот заради социјалната исклученост со којашто се соочиле како резултат на тоа што биле „одделени“ од своите Фејсбук-пријатели.
„Наодите покажаа дека апстиненцијата од Фејсбук го намали нивото на кортизол кај учесниците во студијата, но личната перцепција за нивото на стресот што го чувствувале не се промени, можеби затоа што тие не беа свесни дека нивниот стрес е намелен“, вели проф. Ванман.
Ванман советува дека наодите може да се однесуваат на било кој социјален медиум во зависност од индивидуалните преференции.
„Значајно е што овие резултати не се однесуваат само на Фејсбук, бидејќи нивоата на стрес кај едно лице веројатно ќе се намалат во секое време кога тоа ќе престане да ја користи својата омилена социјална мрежа“, заклучува тој.
