Несоницата е позастапена кај женскиот пол, во напредната возраст и кај луѓе што се перманентно изложени на стресни и кризни ситуации
Спијте подобро, живејте подолго! Несоницата, несомнено, е една од болестите на модерното време. Современиот човек е под континуиран притисок на високи очекувања, а благодарение на брзиот технолошки развој, секојдневно е бомбардиран со немерлива количина информации, секогаш е достапен за сите и едноставно нема време за себе. На овој начин акумулира огромни количини стрес кој честопати се ефектуира во несоница.
Имајќи во предвид дека мирниот сон е предуслов за човечкото здравје, работоспособноста и доброто расположение, сосема логична е констатацијата на многу здравствени работници дека ненавремен третман на несоницата може дополнително да придонесе до развој на бројни психијатриски растројства. Статистичките податоци укажуваат дека дури една третина од населението во зрелата возраст има одредени проблеми со спиењето а дури околу 95% од Американците имаат најмалку една епизода на несоница во текот на животот.
Потребното времетраење на сонот варира од личност до личност, како и од нејзината возраст. На просечен човек му требаат од шест до осум часа спиење.
Несоницата се карактеризира со незадоволителен квантитет и квалитет на спиењето, кој трае подолг временски период и вклучува потешкотии со заспивањето, потешкотии со континуитетот на спиењето, како и рано будење. Заради нарушениот квалитет и квантитет на сонот, пациентите наутро се чувствуваат уморни, напнати и се со намалена социјална и работна ефикасност. Присутна е мисловна преокупација која особено се интензивира навечер (дали вечерва ќе успеам да заспијам).
Луѓето кои имаат проблеми со несоница честопати имаат симптоми на дневна поспаност, главоболка, замор, анксиозност, раздразливост, тешкотии во концентрирањето и нарушена способност за извршување на нормалните активности. Со еден збор, несоницата е сериозен проблем кој значајно го влошува квалитетот на живот.
Несоницата е позастапена кај женскиот пол, во напредната возраст и кај луѓе што се перманентно изложени на стресни и кризни ситуации. Во овој контекст, една од најкритичните групи за развој на несоница се деловните луѓе. Тие честопати, под притисок на секојдневните обврски, несвесно влегуваат во повторливо стресно сценарио: рано станување, брзање, константна трка со времето за да се достигнат високи бизнис цели и немање време за семејството, што на крајот од денот, резултира со несоница.
Се проценува дека околу 40 посто од деловните луѓе страдаат од симптоми на несоница и раздразливост. Посебно се опасни стресните ситуации кога ќе дојде до пропаѓање на важен договор или при тензични и долготрајни преговори. Дополнителен фактор за несоница кај бизнисмените се и честите патувања, долготрајните возења со автомобил, промената на временските зони и преспивање во хотели со што се нарушува секојдневниот ритам на спиењето .
Третманот зависи од причината и типот на несоница.
Тоа значи дека не секој пациент со несоница треба веднаш да консултира лекар. Првиот чекор се состои во примена на нефармаколошка терапија, т.н. хигиена на сон, промени во стилот на живеење и промени во начинот на исхрана. Кај оние кои не реагираат на ова, се советува примена на природни препарати на база на мелатонин, валеријана, маточина и други кои помагаат за смирување и полесно заспивање.
Еден од природните суплементи кој се користи во третман на несоница е мелатонинот. Хормон кој го скратува времето потребно за заспивање кај оние пациенти кои имаат нарушен деноноќен ритам или кај тие со ниски нивоа на мелатонин. Функционира на начин што ја намалува телесната температура и предизвикува заспивање. Суплементите со мелатонин превенираат jet lag кај оние луѓе кои преминуваат повеќе временски зони. За третман на несоница се користат и суплементи на растителна база. Некои од растенијата кои се користат при оваа индикација се: корен од валеријана, маточина и друго. Екстрактите од валеријана и маточина се природни седативи и антидепресиви, т.е помагаат за смирување и квалитетен сон, го подобруваат расположението, когнитивните способности и меморијата.
Комбинацијата од овие 3 состојки доведува до смирување, лесно опуштање и брз вовед во сонот кој потоа има добар квалитет и континуитет. Се препорачува за сите возрасни групи, без опаснот од навикнување кон лекот
Совети за справување со несоница
Во најголем дел на полесни форми на несоница и несоница која трае пократко време, може да помогне примената на т.н. „добри навики за спиење“. Во прв ред, тука спаѓаат одење на спиење и станување во одредено – исто време, укинување на попладневно спиење и заспивање пред 23 часот. Препорачливо е да се спие во мирна, ладна и темна соба, на удобна постела.
Треба да се избегнува работа на компјутер и други електронски направи или гледање телевизија, а наместо тоа може да се слуша релаксирачка музика или да се чита омилената книга.
Внимавајте на исхраната: намален калориски внес во храната за вечера, да се избегнува кафе, кока кола, енергетски пијалоци, солени јадења, алкохол и пушење пред спиење. Пожелни се редовни попладневни физички активности, бидејќи придржувањето до извесен план на вежбање придонесува за попуштање на напнатоста и враќање на самодовербата. Сепак вежбањето не смее да биде пренапорно, и треба да има најмалку 2 часа растојание помеѓу последниот тренинг и ноќното спиење.
И најважно, најдете време за себе!!!
