Ако постојано ви недостига енергија, тоа може да биде знак за ниско ниво на железо.
Здравата исхрана во вистинските количини е клучна за нашето добро здравје, а потребите на нашето тело се менуваат како што старееме. На пример, со текот на времето потребите за внесување на витаминот Д се зголемуваат. Поради ова, кај постарите возрасни лица често се појавуваат проблеми кои се должат на недостакот на некоја хранлива материја.
Оттука, препознавањето на знаците и симптомите што се должат на слаба и лоша исхрана, како и на недостатокот на одреден витамин или минерал, е клучно за да може навремено да се реагира со цел да се избегнат посериозни здравствени проблеми. Симптомите коишто се појавуваат како резултат на недостатокот на некој витамин или минерал може да бидат различни, но вклучуваат:
Чувство на умор
Ако постојано ви недостига енергија, тоа може да биде знак за ниско ниво на железо. Ниските нивоа од овој минерал може да доведат до анемија – состојба којашто се манифестира со недоволно црвени крвни клетки за да го пренесуваат кислородот и хранливите материи во сите делови од вашето тело. Заморот, исто така, може да биде симптом за некои здравствени состојби, како што се срцеви заболувања или проблеми со тироидната жлезда. Но исто така тоа би можело да значи дека не внесувате доволно протеини преку исхраната.
Сува коса
Сувата коса може да се појави ако имате анемија или немате доволно протеини или одредени витамини. Кога вашето тело не е снабдено со хранливи материи, тоа ги праќа хранливите материи што ги има на најважните органи на вашето тело, како срцето. Тоа значи дека другите делови од телото, вклучувајќи ја и косата, добиваат помалку хранливи материи што може да се манифестира со сушење на косата. Лошата исхрана, освен на косата, може лошо да влијае и на кожата, правејќи ја сува, тенка и бледа.
Тенки и кршливи нокти
Лошата исхрана може да предизвика и промени кај вашите нокти. Како и косата, ноктите може да станат тенки и кршливи, како и да добијат искривување во форма на лажица, особено на показалецот или третиот прст што може да биде знак дека имате недостаток на железо. Освен заради недостаток на железо, проблемите со ноктите може да бидат предизвикани од ниски нивоа на протеини, калциум или витамини А, Б6, Ц и Д.
Проблеми со забите
Устата е едно од првите места каде што може да се забележат првите знаци на слаба исхрана. Недостатокот на витамин Ц може да предизвика крварење и иритираност на непцата заради гингивит и др. проблеми со забите.
Опстипација
Опстипација, или запек, може се појави доколку преку исхраната не внесувате доволно растителни влакна, што може да се најдат во целите зрна, овошјето и зеленчукот.
Промени во расположението и проблеми со менталното здравје
Слабата и лоша исхрана може да игра улога во појавата на проблеми со менталното здравје. Таа може да влијае на различните активности и да предизвика да изгубите интерес за нешта што претходно ви причинувале задоволство.
Лесно повредување и бавно лекување
Ако забележите дека лесно се повредувате и раните бавно ви заздравуваат, исхраната може да го предизвикува тоа. Во вакви случаи треба да проверите за недостаток на протеини, витамин Ц или витамин К, кои се потребни за лекување на рани. Витаминот Ц помага ткивото да се регенерира, а витаминот К е важен за згрутчувањето на крвта.
Слаб имунолошки систем
Без правилна и здрава исхрана имунолошкиот систем може да ослабне и да не може правилно да се бори против различни болести и инфекции. Некои од најважните хранливи материи за силен имунолошки систем се протеини и цинк, заедно со витамини А, Ц и Е.
