Споделете со пријателите!
Трчањето можеби изгледа како едноставна физичка активност, но сепак е потребно да се информирате како правилно да трчате
Повеќето би рекле дека трчањето е многу едноставно и не потребно предзнаење, ниту особена претходна подготовка. Но ова не е целосно точно. Кога би било точно, тогаш не би постоеле тренери и инструктори за трчање. Исто така, правилниот начин на трчање спречува повреди, што е главниот демотиватор, бидејќи после мала повреда ретко кој му се враќа на трчањето, тврдејќи дека тоа не е за нив. Правилното трчање е подеднакво важно колку и изборот на патики кои што ќе ви овозможат најдобра заштита и најдобро искуство.
Правилното трчање ќе ви овозможи да трчате побрзо, поефикасно, со оптимален телесен напор, затоа доколку трчате, или планирате да започнете со трчање, прочитајте ги петте најважни совети.
- Гледајте пред вас. Очите треба да ви бидат фокусирани на земја пред вас на растојание од неколку метри. Никако не гледајте во вашите стапала. Исто така, кога гледате пред вас, најмали се шансите да се повредите, бидејќи ќе бидете свесни за околината.
- Формирајте стил на трчање. Постојано бидете свесни за стилот на трчање, особено ако сте почетник. Внимавајте да не „слетувате“ директно на цело стапало и со цела тежина. Никако не трчајте на прсти, ниту пак директно на пета. Соодветни патики ќе ви помогнат да трчате побезбедно.
- Внимавајте на дишењето. Секој има свој ритам на трчање, кој секако зависи од физичката подготвеност и кондиција, но вдишување на два чекори и издишување на наредните два чекори, се смета за оптимално.
- Исправете се. Бидете свесни за горниот дел од телото. Движете ги рамениците, а не лактите. Свиткајте ги рацете во лактите и формирајте лесна тупаница. Рацете никако не треба да висат опуштено формирајќи неконтролирани движења. Свитканите лакти се важни за соодветно темпо и целосна рамнотежа. Останува уште да го стегнете стомакот и да се исправите.
- Загрејте се. Загревањето и истегнувањето се најважни за правилно трчање. Доколку не се загреете и истегнете соодветно, колку и да внимавате на стилот на трчање, нема да избегнете повреда. Никако не се истегнувајте статично и правете лесни вежби. Исто така, телото треба да ви биде стегнато но никако круто, што значи дека рамениците треба да ви бидат опуштени. Трчањето треба да биде активност која ќе ве релаксира и не треба да ви претставува голем напор ниту болка.
Споделете со пријателите!
