Феталните клетки имаат многу корисни својства за научните истражувања. Сепак, употребата на феталното ткиво и феталните клетки е контроверзна затоа што тие најчесто доаѓаат од абортирани човечки фетуси
Експертите велат дека феталното ткиво е круцијално за многу области на медицински истражувања, вклучувајќи ги студиите за мозочни болести и човечки развој и третманите за повреден `рбетен столб. Тие сметаат дека феталните клетки имаат многу корисни својства; способни се да се размножуваат и растат со неверојатно темпо што е од особено значење за многу видови истражувања. Феталното ткиво им овозможува на научниците да дојдат до одговори на многу прашања што не можат да бидат одговорени на поинаков начин.
Со истражувањата врз феталното ткиво, научниците дознаваат што се случува во раните фази од човечкиот развој и што се случува во случаите на спонтан абортус.
Но, само заради тоа што станува збор за истражувања на ткива од неродените, противниците на овој вид истражувања тврдат дека се неетички. Поборниците на овој вид истражувања, исто така сметаат дека пронаоѓањето на третмани и лекови за разни болести ги принудува научниците да истражуваат од разни агли. „Ние ја затвораме вратата за истражувањето и никогаш нема да дознаеме каков напредок би можеле да оствариме“ – вели Хедер Пирс – Heather Pierce, од Асоцијација на амер. медицински колеџи, во изјава за поддршка на истражувањата на фетално ткиво. Од многуте намени на феталното ткиво во медицинските истражувања, ќе набориме пет:
1. Алцхајмерова болест
Д-р Лари Голдстин – Larry Goldstein, професор по клеточна молекуларна медицина од Универзитетот во Калифорнија, Сан Диего, објасни како тој го користи феталното ткиво во своето истражување на Алцхајмеровата болест. За да се направи модел на болеста на мозокот во лабораториски сад, на научниците им се потребни типови на мозочни клетки наречени астроцити што им помагаат во поддршката на другите мозочни клетки, објасни Голдстин. Овие фетални клетки ослободуваат фактори за раст и други супстанци што ги одржуваат нервните клетки здрави и им овозможуваат на мозочните клетки да прават конекции.
2. Развој на органи
Феталното ткиво, исто така се употребува во истражувањата за тоа како органите се развиваат. Крајната цел на овие истражувања е растење нови органи како замена за оштетените. Некои истражувања се фокусирани на тоа дали може да се создадат бубрези од матични клетки. Д-р Голдстин вели дека потребно е истражување на феталното ткиво со цел да се одредат најраните биохемиски сигнали што ги поттикнуваат клетките да создадат бубрези.
3. Фетални болести
Разбирањето на состојбите што започнуваат и се случуваат во матката, како и оние кои доведуваат до спонтан абортус или раѓање на мртво дете, се само уште една причина за истражувањата врз феталното ткиво. По пат на студии врз фетално ткиво, научниците го разоткриваат Зика вирусот за да дојдат до одговорот на кој начин се појавува микроцефалијата.
[interaction id=”57b4725bfdaf822c684f82fa”]
4. Истражување на вакцини
Феталното ткиво е од огромно значење за развојот на многу вакцини што се употребуваат денес. Но, научниците не можат секогаш да користат стари клетки за истражување на нови вакцини, па затоа потребно им е ново фетално ткиво. Според Институтот Guttmacher, во моментов научници развиваат вакцина против ХИВ и ебола.
5. Третмани кај повреден `рбетен мозок
Феталните клетки растат побрзо од зрелите клетки. Како што објаснува институтот Guttmacher (непрофитната организација што се залага за репродуктивното здравје), феталните клетки исто така предизвикуваат помал имунолошки одговор, па затоа постои помал ризик од отфрлање од страна на пациентот. Досегашните студии на животни покажаа дека феталните клетки можат да се развијат во нови неврони и можат да пренесуваат информации во склопот на местото на повредата на `рбетниот столб – додаде д-р Голдстин. Наскоро се очекува овие студии да се спроведат и врз луѓе.
