Не се само гените важни кога станува збор за добро стареење
„Староста не е за слабаци“ е позната изјава на актерката оскаровка Бети Дејвис. Оваа изјава е смешна само затоа што е точна. Да се старее добро, односно здраво, без да се потклекне на предизвиците и проблемите коишто животот ги носи, секако е тешка работа. Вежбањето, правилната исхрана и позитивниот став се подеднакво важни колку и гените, ако сакате да стареете добро. Стареењето е природен процес кој е неминовен за сите, но секој различно се соочува со него. Некои сакаат вештачки да ја одржат младоста со операциски зафати, додека некои тоа го прават со здрав начин на живот. Прочитајте кои се навиките на луѓето коишто изгледаат добро во староста.
Тие имаат позитивен став кон животот
Оние коишто ја сметаат староста како време на мудрост, побрзо оздравуваат отколку оние коишто староста ја гледаат како слабост, вели едно истражување. Ова истражување заклучува дека старите лица со позитивен став кон староста за 44 проценти повеќе, целосно заздравувале после тешки повреди, за разлика од оние коишто размислувале негативно.
Одржуваат пријателства
Пријателствата и дружењето имаат големо значење за менталното здравје. Спроведени се истражувања коишто покажале дека лицата со посилни социјални врски подолго живеат, а оние без пријатели, осамените повеќе патат од хронични здравствени проблеми и депресија.
Внимаваат што и колку јадат
Храната е важен дел за одржување на здравјето. најновите истражувања истакнуваат дека храната со низок гликемиски индекс, богата со многу овошје и зеленчук, производи со цело зрно и протеини, овозможуваат добро здравје. нутриционистите ја препорачуваат медитеранската диета, богата со свежи продукти, производи со цело зрно, јаткасти плодови и една чаша црвено вино дневно. Овој начин на исхрана вклучува на менито и риба два пати неделно и избегнување на сол и солена храна. секако, важно е и да не се прејадувате. Умереноста е клуч за правилна исхрана.
Активни се
Да се остане активен е важен дел од добро стареење. Жените после 30-тата година забрзано ја губат мускулната маса, но вежбањето, поточно вежбањето со отпор или со тегови не само што ја зголемува силата на мускулите, ве прави поиздржливи и овозможува виталност и одржување на мускулите до староста. Останувањето фит исто така може да ги намали болестите поврзани со губење на меморијата, заклучува едно истражување.
