Сè уште не знаете да пливате? Дознајте зошто вреди конечно да го надминете стравот од вода ова лето
Поттикнете ја вродената способност што ја имаме запишано во гените и соочете се со стравот од вода. Најубаво е да се научи некоја вештина уште од мали нозе, па доколку вашите дечиња сè уште не знаат да пливаат, а и вие исто така не знаете, токму ова лето можете да учите заедно со нив и при тоа одлично да се забавувате. Пловноста на водата овозможува правење на вежби кои се тешки и невозможни на копно. Водата дава континуиран отпор на сите движења што ги правиме. Водата нуди 12% до 14% повеќе отпор во споредба со вежбањето на копно и токму тој отпор не дозволува ненадејни движења на телото.
Потврдено е дека пливањето е една од најдобрите вежби како за телото така и за умот.
Зошто да научите да пливате? Пливањето со себе носи бројни придобивки за телото, душата и умот. Додека пливаме не се потиме бидејќи водата има разладувачки ефект и затоа шансите од прегревање се помали. Водата постојано ни го лади телото, па затоа вежбањето во вода е попријатно и поудобно. Пливањето не само што има одлични терапевтски својства и го паузира процесот на стареење, оваа спортско-рекреативна активност ни дава можност да заборавиме на стресното секојдневие и да се опуштиме.
Пливањето помога во слабеењето и во одржувањето на стабилна телесна тежина
Човек со тежина од 70 килограми, троши 210 калории со лежерно пливање во времетраење од само половина час. Пливањето го редуцира стресот и ја зголемува самодовербата. Според едно истражување спроведено врз четири илјади пливачи од страна на компанијата „Спидо“ – Speedo, 74% се согласуваат дека пливањето ослободува од стрес и тензии, 68% велат дека престојот во вода им помага да се чувствуваат добро и 70% се чувствуваат ментално освежени по пливањето.
Пливањето ги зајакнува мускулите
Отпорот на водата може да биде до 44 пати поголем од отпорот на воздухот, што значи дека и помалите движења во вода повеќе ги напрегаат мускулите. Ефектот на вежбањето во вода или пливањето, може да се спореди со вежбање со специјални справи, само без употреба на справи. Пливањето се одликува од копнените вежби со тоа што носи најмал ризик од повреди на зглобовите, коските и мускулите во споредба со вежбите на суво или вежбите во теретана.
Пливањето го заштитува здравјето
Пливањето го подобрува сонот. Според една анкета на Националната американска фондација за спиење – National Sleep Foundation, луѓето кои често пливаат имаат помалку проблеми со спиењето. Пливањето го намалува ризикот од појава на болести. Тоа е одлична кардиоваскуларна вежба која успешно го контролира нивото на шеќер во крвта, крвниот притисок и го редуцира лошиот холестерол во телото. Ова значи дека со редовно пливање, го намалуваме ризикот од појава на дијабетес тип 2, срцеви болести и мозочен удар.
