Пробиотиците индуцираат продукција на проинфламаторни цитокини, тумор некротички фактор и интерлеукин 6, стимулирајќи го неспецифичниот имунитет
Со самото раѓање новиот организам се судира со бројни антигени од надворешната средина. Помеѓу другото новороденчињата се раѓаат со практично стерилен цревен систем кој во текот на раниот раст и развој се колонизира со различни микроорганизми. Во овој процес на колонизација на цревото како и на контакти со бројни патогени од надворешната средина, се изградува имунитетот на детскиот организам. Според бројни истражувања градењето на базичниот детски имунитет трае барем до 3тата година а дури 70 до 80% од нашиот имунитет e локализиран во цревата што се должи на лимфните јазли присутни во слузницата на тенкото црево. Периодот на колонизација е исклучително важен и зависи од исхраната на бебето и затоа, првите години од животот се клучен период во кој може да се интервенира за да се обликува микрофлората на најсоодветен начин. Во случај на нарушување на раната колонизација и неуспех во воспоставувањето на нормална микрофлора во стомакот се јавуваат бројни проблеми поврзани со варењето на храната, инфантилни колики, дијареа и алергии.
Бројни студии правени со администрација на различни типови на пробиотици од најрана возраст ја потврдуваат нивната суштинска улога во зајакнувањето на цревната заштитна бариера како и во превенција и третман на вообичаените болести како што се инфантилни колики, дијареја и алергија. Пробиотиците индуцираат продукција на проинфламаторни цитокини, тумор некротички фактор и интерлеукин 6, стимулирајќи го неспецифичниот имунитет. Истотака тие ја активираат продукцијата на макрофаги, и ја засилуваат фагоцитозата на патогените. На крајот, со администрирањето на пробиотици се стимулира транспортот на антигени преку лимфните ткива во тенкото црево, и со сите овие механизми се зголемува неспецифичната резистентност на домаќинот кон патогените, со што се намалуваат патогените во цревата.
При тоа многу важен е сојот на пробиотици кој се користи: Lactobacillus rhamnosus, кој е природен жител во цревната миркофлора кај доенчињата и децата има позитивен одговор при акутна инфективна дијареа предизвикана од ротавируси, постантибиотска дијареа, дијареа предизвикана од Clostiridium difficile и атопичен дерматит. Континуирана примена на Lactobacillus rhamnosus значајно го намалува и времетрањето на респираторните инфекции кои се најчест проблем кај оваа ранлива популација. Од друга страна L. Reuteri има одличен ефект во намалувањето на фреквенцијата на доеначките колики.
Покрај пробиотиците, потврдено е и дека витамин Д има важна улога во модулирањето на имуниот систем.
Витаминот Д не само што е клучен за нормален раст и развој на коските туку и има против-воспалително дејство, заштитно влијание на цревниот ѕид (ја потикнува неговата регенерација), има значаен ефект во намалување на гастроинтестиналните инфекции (Кронова болест и улцеративен колит) како и при превенција и третман на атопичен дерматит.Ова се должи на неговото учество во изградбата на моноцитите како и регулацијата на функцијата на Т лимфоцитите.
Заради сето ова производите кои во себе содржат пробиотици и витамин Д се одличен избор за суплементација од најрана возраст, помагаат за одржување здрава цревна микрофлора, регулирање на дигестивните проблеми, зајакнување на имунолошкиот систем , скратување на времето на респираторните инфекции и намалување на инфламаторните процеси.
Д-р Сунчица Јосифовска – специјалист педијатар
