Променете ја секојдневната рутина!
Квалитетниот одмор е есенцијална нишка во одржувањето на нашето здравје. Секојдневните работни и домашни обврски континуирано ги празнат нашите капацитети и може да не доведат во состојба на значаен психофизички замор. Во таква ситуација може да дојдеме во состојба на нарушена способност за извршување на нормалните активности, ќе носиме погрешни одлуки, а може да дојде и до пад на имунитетот, незаинтересираност за работата и семејството, повлекување и депресија.
Токму затоа е многу важно летниот одмор да се искористи соодветно, за се релаксираме, добро да ги „наполниме батериите“ и спремни да ги пречекаме новите животни и работни предизвици.
Променете ја секојдневната рутина
Иако вообичаните активности ни помагаат за полесна организација и успешно завршување на обврските сепак долгорочно тие стануваат „наш затвор“ и извор на стрес, незадоволство од себе и депресивни мисли. Летниот одмор е идеален момент да направите промена:
- Одете на одмор подалеку од дома а најдобро некаде каде што не сте биле никогаш. Тоа ќе ви даде нов предизвик и ќе ја разбуди вашата креативност;
- Ослободете се од вообичаените обврски: купување, готвење, чистење итн. За таа цел ако сте во можност, одете во хотел со минимум полупансионска услуга;
- Комуникацијата поврзана со работата сведете ја на минимум. Завршете ги обврските пред поаѓање на одмор и одговарајте само на неодложни повици, а проверката на меилови правете ја на неколку дена.
Имајте активен одмор
Во текот на годината голем дел од нас едноставно не успеваат да најдат време за себе, за редовна физичка активност и свое хоби. На овој начин не само што доаѓа до акумулација на стресот туку и постои опасност од покачување на телесната тежина и нарушување на вредностите на холестерол, триглицериди и шеќер во крвта што носи бројни здравствени ризици. Летниот одмор е нова шанса за враќање на добрите навики:
- Спортувајте! Независно дали е тоа пливање, планинарење, трчање или лесни прошетки во природа, бидејќи на овој начин ќе придонесете за зацврстување на мускулите и намалување на стресот;
- Одвојте време за вашето хоби кое ќе ве релаксира и ќе ви даде дополнителен смисол на животот;
- Читајте белетристика! Летниот одмор е добра можност за унапредување на фондот на зборови но и лично преиспитување и напредок што ќе придонесе за вашето психичко здравје!
Одморот е најдобар со семејството и пријателите
Летниот одмор во кругот на најблиските е прилика за ново зближување и будење на убавите спомени што несомнено духовно ќе ве збогати. Затоа не заборавајте овој одмор да го искористите да ги посетите роднините кои не сте ги виделе подолго време и да испиете кафе со старите пријатели. И најважно од се дружете се со вашите деца. Не случајно се вели дека децата најмногу растат и напредуваат кога се на распуст!
