Морската храна е одличен избор во летниот период. Прочитајте за сите здравствени и хранливи придобивки кога е во прашање овој вид на исхрана!
Морската храна е специфична по вкус, што се вели или ја јадеш или не, но затоа содржи хранливи материи во изобилие. Кога станува збор за морска храна, важно е да ги знаеме сите здравствени придобивки што би ги почувствувале доколку ја јадеме оваа храна. Убаво е да се знае дека е одлична за децата затоа што е богата со хранливи материи што им се потребни за развој, но и за возрасните бидејќи е здрав извор на протеини и содржи значително помалку калории.
Хранливи придобивки од морската храна
Ако ја имаме навиката да бидеме умерени и да ја задржиме разновидноста кога станува збор за здрави навики во исхраната, тогаш се доближуваме еден чекор поблиску до подобро здравје. Поради многуте хранливи материи кои ги содржи, се препорачува да се јаде разновидна морска храна барем два пати неделно. Кога станува збор за избор на морска храна или друг вид на месо, изберете ја морската храна секогаш кога имате можност за тоа. Морската храна е извор на:
- Здрави протеини. Протеините во месото на морската храна се полесни за варење затоа што во ова месо, за разлика од црвеното месо, има помалку сврзно ткиво.
- Ниско ниво на заситени масти. Дури и најмрсната риба има ниво на масти кое е слично на нивото на мастите кај останатите помалку мрсни видови на месо. Ако месото на морската храна е побело, тогаш нивото на масти е пониско отколку кај морската храна со потемна боја на месо. Морската храна содржи незаситени масти (треба да ги избегнуваме заситените, а да се држиме до незаситените масти во храната) меѓу кои се вбројуваат и омега 3 масните киселини.
- Омега 3 масни киселини (EPA и DHA). Тие играат главна улога во намалувањето на ризикот од срцеви заболувања, влијаат врз намалување на холестеролот во крвта, врз развитокот на здрав мозок и вид кај малите деца, итн. Најчесто, помрсната морска храна содржи повеќе омега 3 масни киселини, но тука влијание има и самиот вид на морска храна. Рибите како лососот, харингата, скушата и сардината содржат повеќе омега 3 масни киселини. ЕПА и ДХА масните киселини им се потребни и на бремените жени или жените што дојат.
- Одредено ниво на холестерол. Икрите, кавијарот и внатрешните органи на рибите можат да содржат високо ниво на холестерол, додека во рибите, школките, ракчињата, остригите, итн. има ниско ниво на холестерол.
- Помалку калории во однос на останатите видови на месо. Ако јадете морска храна ќе ги задоволите дневните потреби за протеини, но ќе внесете помалку калории. Затоа препорачливо е да јадете морска храна ако сакате да ја одржите или да ја намалите вашата тежина.
- Умерени количини на натриум. Кога станува збор за внесување на сол и натриум во организмот умереноста е најдобра. Ова помага во намалување на ризикот од висок крвен притисок. Рибите, како дел од широкиот спектар на морска храна, содржат ниско ниво на натриум, школките содржат поголемо ниво, додека пак во замрзнатата или процесираната храна има доста повисоко ниво на натриум најчесто поради додадената сол при процесирањето.
- Витамини и минерали. Рибите содржат витамин Б, а помрсните риби како скуша или харинга се добар извор на витамин Д и витамин А. Најголем дел од морската храна содржи доста минерали како фосфор, калиум и селен. Конзервираните риби може да содржат калциум, додека школките и остригите содржат железо, цинк, магнезиум, јод и други видови на минерали.
Здравствени придобивки од морската храна
Морската храна и хранливите материи што ги содржи во изобилие, во кои спаѓаат и омега 3 масните киселини, влијаат позитивно врз човечкиот организам. Овој вид на храна е значително полезен ако сакаме да сме во одлично здравје. Еве кои се здравствените придобивки кога станува збор за влијанието на оваа храна врз некои од органите во телото на човекот.
Срце
Морската храна го намалува ризикот од срцеви заболувања меѓу кои спаѓа и аритмијата на срце, заштитува од срцев удар, го намалува нивото на триглицеридите во крвта, ја намалува можноста за згрутчување на крвта, ја подобрува циркулацијата и меѓу другото го зголемува нивото на т.н. добар холестерол.
Мозок и ментално здравје
Овој вид на исхрана придонесува за здрав и правилен развој на мозокот кај мали деца. Исто така, ја подобрува регенерацијата на мозочните клетки, меморијата (особено кај повозрасните лица), и го намалува ризикот од појава на Алцхајмерова болест.
Го подобрува и менталното здравје така што го намалува ризикот од појава на некои болести како депресија, биполарно растројство или нарушувања во расположението.
Очи
Морската храна е одлична за очите и помага за развој на остар вид.
Мускули
Морската храна помага во градењето на мускулите и ткивата.
