zivotot-pocnuva-posle-vtoroto-kafe_image1
Споделете со пријателите!

Хороскоп за 13та недела: Дознајте какво ќе биде вашето здравје наредната недела, за да знаете што точно да игнорирате и да продолжите со старите навики надевајќи се на најдоброто.

Овен

Големите сериозни хороскопи ви предвидуваат бурни промени наредната недела (заради присуството на Уран, ако не сте знаеле), а вие никако да се освестите и после третото кафе. Ќе креирате необични математички проблеми, односно од еден ќе направите пет проблеми. Мигрените се последица од тоа што не ве бива за математика. 

 

Бик

Неделава ќе практикувате нинџа диета, што значи дека ќе јадете сè, но цело време ќе внимавате да не ве види некој. И покрај напорите што ќе ги вложувате периодов за да ја подобрите кондицијата и да ослабете, најтенок дел, сега за сега, ви остануваат живците. 

 

Близнаци

Вие сте луѓе кои што, без оглед колку години имате, секогаш размислувате што сакате да бидете кога ќе пораснете. Исто така, ќе размислувате да го пронајдете вистинскиот начин за да ја направите погрешната работа. Тоа некако само вам ви успева да го направите со шарм и без жртви. Кон крајот на неделата, ќе патите од вртоглавици од многу мислење.  

 

Рак

Неделава ќе имате проблеми со спиењето. Ќе ве мачат несоници, бидејќи секоја вечер околу 2 по полноќ, ќе се будите со празнина, најизразена во пределот на стомакот. Несониците ќе резултираат со зголемување на обемот околу половината. Вам тоа нема да ви биде важно, бидејќи и така сте најсреќни кога сте во пижами.

 

Лав

Арогантноста е дел од вашиот шарм, па неделава ќе бидете неподносливо шармантни. Најмногу ги сакате оние совети кои што можете најбрзо да ги игнорирате. Сите мислат дека патите од привремена глувост, но вие всушност уживате во добро извежбаното селективно слушање.

 

Девица

Она што нема да ви оди по план, ќе ви оди на живци. Вашите планови имаат нервози, бидејќи се под притисок дека треба да се реализираат, а се толку многу. Олабавете и дишете од воздухот кој периодов е чист. Упс, заборавивме на вашата пролетна алергија.

 

Вага

Ќе бидете вознемирени и нема да знаете како да се смирите. Нема да знаете што ви треба, дупло кафе, добро јадење или сон од три недели. На крај, за вашата неодлучност ќе го обвините променливото време.

 

Шкорпија

За некои луѓе најдобра терапија е долга прегратка, но вие не сте тие луѓе. Ќе патите од лошо здравје не поради тоа што ќе го јадете, туку поради тоа што ќе ве јаде вам. Најмногу од завист и љубомора кон луѓето кои што веруваат во среќа и подобра иднина.

 

Стрелец

Неделава ќе ве прати среќата, но никако да ве стигне. Емоциите ќе ги префрлите на задно седиште и бидејќи нема да им дозволите да ве „возат“, ќе пропуштите многу убави моменти за сметка на тоа што ќе се обидувате да сте рационални. Добре дојдовте во животот со стрес како нормална состојба.

 

Јарец

Неделава ќе бидете подложни на искушенија и предизвици. Па тоа е вашето секојдневие секоја недела! Вам ви е предизвик секоја нормална комуникација, а особено кога треба да ви е забавно. За вас и најмалата промена претставува нервоза и анксиозност, па затоа нема да мрднете подалеку од вашата дневна соба.

 

Водолија

Само да ви кажеме дека со тоа што не читате никаков хороскоп, сте пропуштиле многу од вашиот живот. Којзнае колку убави работи ви се случиле, а вие не сте ни свесни. Напредување на работното место, возбудливи моменти на приватен план и големи животни промени. Здравјето, а особено менталното здравје, ви е одлично, токму затоа што не читате хороскоп.

 

Риби

Ве нервираат луѓе кои не знаат да мислат, а мислат дека знаат. Вашите филозофски размисли и така никој не ги сфаќа, па затоа најмногу ќе уживате во сарказмот кој ви е еден од најдобрите пријатели. Освен тоа, тој никогаш нема да ве изневери. 

Прочитајте:  Луд женски Хороскоп

Споделете со пријателите!