Ново истражување докажа дека одреден вид на вежби можат да го забават процесот на стареење бидејќи ја подобруваат функцијата на клетките
Луѓето трошат многу пари и време во потрага на еликсирот на младоста, но според најновата студија, не треба да бараат повеќе. Освен тоа, еликсирот може да биде бесплатен. Најновото истражување од Mayo Clinic, открива дека одреден вид на вежби може да го забават процесот на стареење.
Како што старееме губиме мускулна маса. Истражувачите открија дека комбиниран вид на вежби може да ја зголеми мускулната маса и на клеточно ниво да влијае врз забавување на процесот на стареење. Одговорот е во видот на вежби коишто во моментов се светски тренд, тоа се вежбите со висок интензитет (HIIT). Ваквиот вид на вежби во комбинација со истегнувања и прилагодени активности, ги поттикнуваат клетките да произведуваат повеќе протеини за да создадат енергија и со тоа „работат“ против процесот на стареење. Протеините имаат огромно биолошко значење и по водата, количински се најзастапени во клетката. Од нив зависат основните особини на клетката.
Истражувањето било спроведено од истражувачи од Рочестер, Минесота и биле таргетирани две старосни групи: од 18 до 30 години и 65 до 85 години. Учесниците биле поделени во три групи со различни фитнес рутини во тек од 12 недели. Истражувањето е публикувано во списанието Cell Metabolism. Учесниците од првата група три дена возеле велосипед со висок интензитет а две дена пешачеле на кардио лента за трчање, втората група два дена неделно практикувале тренинг за издржливост и сила, а учесниците од третата група вежбале комбинација од претходните две групи: пет дена во неделата возеле велосипед со помал интензитет и помалку подигале тежина од втората група.
Научниците откриле 49 проценти зголемување на митохондриалниот капацитет (митохондриите се клеточни органели кои се наоѓаат во сите клетки, во кои се врши аеробното разградување на материите и се ослободува енергија) кај оние коишто вежбале вежби со висок интензитет, со зголемување од 69 проценти кај постарите учесници.
„Вежбите со висок интензитет ја поттикнуваат машинеријата (рибозомите) да произведува протеин“ вели д-р К Шрикумаран Наир (К Sreekumaran Nair, M.D., Ph.D.) ендокринолог и автор на студијата. Ваквите вежби ги поттикнуваат клетките да произведуваат повеќе протеини коишто создаваат поголема енергија. Воедно се подобрува и способноста на клетките да направат нови протеини, со што се менува ефектот на стареење, односно се добива ефект на „подмладување“.
„Ги поттикнуваме сите да вежбаат редовно, но пораката за постарите лица е дека вежбите со висок интензитет изведувани под професионален надзор се најдобри, бидејќи носат најмногу придобивки како на метаболично, така и на молекуларно ниво“ заклучува д-р Наир.
