Прочитајте како тренингот за сила влијае врз подобрување на здравјето
Тренингот за сила (strength training) опфаќа повеќе видови на вежби како тежински тренинг, подигање тегови, склекови, стомачни и сл. Бројни се причините зошто треба да го практикувате овој вид на фитнес вклучувајќи: подобрување на рамнотежата, зацврстување на коските, ефективно слабеење. Најчестата дилема на оние коишто практикуваат тежински тренинг е дали е поважна тежината или бројот на повторувања за постигнување на најдобри резултати. Едно истражување ја решава оваа дилема и заклучува дека она што влијае врз зголемување на силата на мускулот, не е тежината или бројот на повторувања, туку нивото на замор кое ќе го предизвикате со одредена вежба.
Тренингот за сила не само што ќе ви го дефинира и зацврсне телото, туку и ќе го подобри вашето целокупно здравје. Еве кои се останатите придобивки од тренингот за сила:
За поздрав мозок
Во најновата студија научниците тврдат дека доколку практикувате тежински тренинг најмалку два пати дневно, вашиот мозок ќе работи подобро. Исто така, овој тренинг за сила превенира деменција, заклучуваат австралиските истражувачи. Ова истражување е важно бидејќи се проценува дека до 2050 година, 135 милиони луѓе ќе развијат деменција.
За ефективно слабеење
Иако се смета дека кардио вежбите се најдобри за слабеење, со тренингот за сила не само што ќе го изгубите вишокот на килограми, туку и ќе ја одржите витката линија. Тоа е заради зголемувањето на отчукувањата на срцето за време на изведување на вежбите. Кога срцето работи побрзо, потребно му е повеќе „гориво“ кое го добива од калориите. Исто така, овој вид на вежби имаат таканаречен afterburn effect. Тоа значи дека заради забрзаниот метаболизам, калориите ќе се топат и откако ќе престанете со вежбање.
За превенција на болести
Тренингот за сила може да биде ефективен како лек за намалување на артритичната болка. Тој исто така помага и кај жените во постменопауза, бидејќи ја подобрува густината на коските и го намалува ризикот од скршеници.
За повеќе енергија и за подобро расположение
Тренингот за сила го подигнува нивото на ендорфин, кој ќе направи да се чувствувате одлично. Исто така, тој е и ефективен антидепресив, ви помага да спиете подобро и да го подобрите квалитетот на живот.
