За некои жени, стравот од раѓање може да биде толку голем што може да ја засени нивната бременост и да влијае врз секојдневното функционирање.
Многу е честа појавата бремената жена да чувствува вознемиреност поради бременоста и самиот акт на раѓање. Бремените жени се грижат за тоа како ќе изгледа болката, контракциите и општо неизвесноста на процесот ја подтикнува загриженоста. Но, за некои жени, стравот од раѓање може да биде толку голем што може да ја засени нивната бременост и да влијае врз секојдневното функционирање.
Овој страв од раѓање се нарекува токофобија – што буквално значи фобија од раѓање.
Токофобијата може да се подели на два вида – примарна и секундарна
Примарната токофобија се јавува кај жени со прва бременост.
За овие жени, стравот од раѓање доаѓа од непријатно искуство во нивното минато – вклучувајќи и сексуална злоупотреба. Таа, исто така може да се поврзе доколку жената била сведок на тешко раѓање на некоја нејзина блиска роднина или пак слушнала непријатна вест поврзана со непријатен исход.
Секундарната токофобија, се случува кај жени кои имаат претходно трауматично искуство од раѓање, што ги остава со страв од повторно раѓање.
Истражувањата покажуваат дека помеѓу 2,5% и 14% од жените се со токофобија. Но, некои истражувачи веруваат дека оваа бројка може да биде повисока и од 22%.
Овие бројки се разликуваат толку многу, бидејќи во студијата се вклучени жени со различни нивоа на токофобија. Бројките може да вклучуваат и жени кои имаат анксиозност и депресија, а не токофобија.
Тешко е да се предвиди кои жени би можеле да бидат засегнати, иако е јасно дека жените со токофобија имаат поголеми шанси да доживеат анксиозност, депресија и други проблеми со менталното здравје.
Истражувањата покажуваат дека жените со оваа состојба избираат да избегнат бременост – до степен да ја прекинат бременоста доколку се најдат во таква ситуација.
Анксиозноста, несоницата, нарушувањата во исхраната и антенаталната депресија, како и зголемениот ризик од постнатална депресија, често се идентификувани како последица на токофобија.
Мајките со токофобија имаат проблем со поврзување со своите бебиња.
Третман на токофобија
Искуствата покажуваат дека клиничката нега за жени со токофобија е тешка. Но добрата вест е дека постои помош за жените со оваа состојба.
Еден од корисните чекори кои може да се направи е посетување на различни едукации и часови кои се однесуваат на раѓањето.
Друг корисен пристап е да се посетува породилното одделение и да се разговара со акушерките за време на бременоста. Но доколку овој страв е толку интензивен треба да се консултира психијатар и да се разгледа можноста за земање на антидепресиви и анксиолитици.
Надминување на токофобијата
Она што е битно да се знае е дека секаде е потребно да биде воспоставена перинатална служба за грижа на ментално здравје за жените и нивните семејства, како и да се има конзистентен пристап кон грижата и поддршката на жените со токофобија.
Оваа потреба доведе до идеја да група практичари, академици и пациенти работат заедно за да ја испитаат грижата и поддршката што им е достапна на жени со овој проблем и да се видат недостатоците.
Токофобијата може да има сериозни ефекти врз жените и нивните семејства. Некои жени свесно ќе ја избегнат бременоста, иако можеби ќе сакаат да имаат деца. За оние кои забремениле, состојбата може да ја засени бременоста и да влијае врз изборот што го прават. Затоа треба да сме свесни за постоењето на ова нарушување за време на бременоста со цел негово препознавање и адекватен пристап.
